បរទេស៖ ក្រសួងសន្តិសុខសាធារណៈរបស់ប្រទេសឡាវ នឹងដាក់ពង្រាយមន្ត្រីនគរបាលចរាចរណ៍ជាង ៧០០នាក់នៅតាមផ្លូវបំបែកជាង១០០ នៅទូទាំងរដ្ឋធានីវៀងចន្ទន៍ ដើម្បីធានាសុវត្ថិភាពចរាចណ៍ក្នុងអំឡុងពេលពិធីបុណ្យចូលឆ្នាំថ្មីរបស់ឡាវនៅពាក់កណ្តាលខែមេសានេះ។
យោងតាមប្រធាននាយកដ្ឋាននគរបាលចរាចរណ៍នៃរដ្ឋធានីវៀងចន្ទន៍ លោក សាងខុម ភុមម៉ាឡាត់ (Sangkhom Phommalat) បានឱ្យដឹងថា នាយកដ្ឋាននគរបាលចរាចរណ៍នៃក្រសួងសន្តិសុខសាធារណៈរំពឹងថានឹងសហការជាមួយនគរបាលខណ្ឌនានាក្នុងរដ្ឋធានីវៀងចន្ទន៍ ដើម្បីបង្កើនសុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍ក្នុងអំឡុងពេលប្រារព្ធពិធីនោះ។
អាជ្ញាធរឡាវនឹងផ្តោតសំខាន់ទៅលើការលើកកម្ពស់ការយល់ដឹងជាសាធារណៈអំពីសុវត្ថិភាពចរាចរណ៍ និងច្បាប់ដែលពាក់ព័ន្ធ ធានាឱ្យចរាចរណ៍ផ្លូវគោកមានភាពរលូនដោយមិនមានបទល្មើសចតរថយន្តខុសច្បាប់ ព្រមទាំងបង្កើនការត្រួតពិនិត្យល្បឿនបើកបរ និងជាតិស្រវឹង។
គ្រោះថ្នាក់ចរាចរណ៍សរុបចំនួន ៣៤២ករណីត្រូវបានគេរាយការណ៍ក្នុងអំឡុងពេលប្រារព្ធពិធីបុណ្យចូលឆ្នាថ្មីកាលពីឆ្នាំមុន ដោយបានសម្លាប់មនុស្សចំនួន ៣៥នាក់ របួស ៥៨៩នាក់ និងខូចខាតយានយន្ត ៥៨៩គ្រឿង។
ពិធីបុណ្យចូលឆ្នាំថ្មីត្រូវប្រារព្ធឡើងចាប់ពីថ្ងៃទី១៤-១៦ ខែមេសាជារៀងរាល់ឆ្នាំ ដើម្បីបួងសួងឱ្យមានអាកាសធាតុល្អ ប្រជាជនមានសុខភាពល្អ និងទិន្នផលច្រូតកាត់ស្រូវបានច្រើន៕
ប្រភព៖ AKP
