បរទេស៖ អាជ្ញាធរក្នុងតំបន់បាននិយាយកាលពីថ្ងៃពុធថា ចំនួនអ្នកស្លាប់ដោយសារខ្យល់ព្យុះភ្លៀង និងអាកាសធាតុត្រជាក់ខ្លាំង ដែលបាននឹងកំពុងរងផលប៉ះពាល់ដល់ខេត្តជាំងស៊ី ភាគខាងកើតប្រទេសចិន បានកើនឡើងដល់ ៧នាក់ហើយ។
យោងតាមស្ថិតិពីទីស្នាក់ការគ្រប់គ្រងគ្រោះទឹកជំនន់ និងគ្រោះរាំងស្ងួតខេត្តជាំងស៊ីបានឱ្យដឹងថា គិតត្រឹមម៉ោង ១០:០០នាទីព្រឹកថ្ងៃពុធ ស្រុកចំនួន ៥៤ ក្នុងទីក្រុងចំនួន ៩ រួមទាំងទីរួមខេត្តណានចាងបានរងការវាយប្រហារដោយគ្រោះមហន្តរាយអាកាសធាតុ រួមទាំងមនុស្សចំនួន៩៣,០០០នាក់បានរងផលប៉ះពាល់។
អាកាសធាតុដ៏អាក្រក់នេះបានបណ្តាលឲ្យខូចខាតដំណាំចំនួន ៥,៧០០ហិកតា ខណៈដែលគ្រួសារចំនួន ១២គ្រួសាររងការបាក់រលំផ្ទះ និង៨០គ្រួសារទៀតខូចខាតផ្ទះយ៉ាងធ្ងន់ធ្ងរ។ ការប៉ាន់ប្រមាណភ្លាមៗ នៃការខាតបង់សេដ្ឋកិច្ចផ្ទាល់ដែលបណ្តាលមកពីគ្រោះមហន្តរាយបានឈានដល់ ១៥០លានយ័ន (ប្រហែល ២១.១លានដុល្លារអាម៉េរិក) ។
ទីស្នាក់ការកណ្តាលខេត្តបានចាប់ផ្តើមការឆ្លើយតបជាបន្ទាន់សម្រាប់ការគ្រប់គ្រងទឹកជំនន់កម្រិត-៣ នៅម៉ោង ១០:០០នាទីយប់ ដែលបណ្តាលមកពីហានិភ័យនៃទឹកជំនន់ទន្លេដោយសារតែអាកាសធាតុធ្ងន់ធ្ងរ។
ក្រសួងធនធានទឹក និងឧតុនិយម បានចេញសេចក្តីជូនដំណឹងស្តីពីការប្រុងប្រយ័ត្នខ្ពស់ ចំពោះប្រជាពលរដ្ឋសូមកុំចេញទៅក្រៅផ្ទះ ខណៈអាកាសធាតុនៅតែបន្ត និងជៀសវាងការហូរចូលតាមប្រព័ន្ធលូ ផ្លូវក្រោមដី និងតំបន់ទឹកមិនហូរក្នុងករណីមានភ្លៀងធ្លាក់ខ្លាំង៕
ប្រភព៖ AKP
