បរទេស៖ ក្រុមមន្ត្រីបាននិយាយថា ប្រទេសចិនបានលេចចេញជាប្រភពនាំមុខគេ នៃការវិនិយោគផ្ទាល់ពីបរទេស (FDI) នៅក្នុងប្រទេសតង់ហ្សានី ដែលរួមចំណែកយ៉ាងសំខាន់ដល់ការអភិវឌ្ឍរបស់ប្រទេសនេះ។
ការកត់សម្គាល់នេះ ត្រូវបានធ្វើឡើងនៅក្នុងការបិទបញ្ចប់ នៃវេទិកាវិនិយោគចិន-តង់ហ្សានីរយៈពេលមួយថ្ងៃ និងសន្និសីទផ្សព្វផ្សាយពាណិជ្ជកម្ម និងការវិនិយោគរបស់ប្រទេសចិន-តង់ហ្សានី នៅទីក្រុងដារ អេស សាឡឹម។
លោក ទូស៊ី គីដា (Tausi Kida) លេខាធិការអចិន្ត្រៃយ៍នៅក្នុងការិយាល័យប្រធានាធិបតី ដែលទទួលខុសត្រូវលើផែនការ និងការវិនិយោគបាននិយាយថា ចាប់ពីខែមករា ឆ្នាំ២០២១ ដល់ខែធ្នូ ឆ្នាំ២០២៣ មជ្ឈមណ្ឌលវិនិយោគតង់ហ្សានី បានចុះបញ្ជីគម្រោងរបស់ប្រទេសចិនចំនួន ២៥៦គម្រោង ដែលមានតម្លៃប្រហែល ២,៥ប៊ីលានដុល្លារអាម៉េរិក។ វិស័យកំពូលទាំង ៥សម្រាប់គម្រោងទាំងនេះគឺ ផលិតកម្ម អគារពាណិជ្ជកម្ម កសិកម្ម ការដឹកជញ្ជូន និងសេវាកម្ម។
លោក អានចេលីណា ង៉ាលូឡា (Angelina Ngalula) ប្រធានមូលនិធិវិស័យឯកជនតង់ហ្សានី បាននិយាយថា ប្រទេសតង់ហ្សានីបានបោះជំហានយ៉ាងសំខាន់ ក្នុងការកែលម្អបរិយាកាសវិនិយោគដែលឈានដល់សមិទ្ធផលជាក់ស្តែង រួមទាំងការទាក់ទាញជាង ១១ប៊ីលានដុល្លារអាម៉េរិក នៅក្នុងគម្រោងដែលដឹកនាំដោយការវិនិយោគរបស់ប្រទេសចិនបង្កើតការងារជាង ១១៤,៧២៦កន្លែង។
ឯកអគ្គរដ្ឋទូតចិនប្រចាំប្រទេសតង់ហ្សានី លោកស្រី ចេន មីងចៀន (Chen Mingjian) បានកោតសរសើរ ចំពោះការប្តេជ្ញាចិត្តរបស់រដ្ឋាភិបាលតង់ហ្សានី និងវិធានការសកម្មក្នុងការទាក់ទាញការវិនិយោគ និងជំរុញការអភិវឌ្ឍសេដ្ឋកិច្ច។ លោកស្រីបាននិយាយថា «យើងមានទំនុកចិត្តលើទស្សនវិស័យ នៃការអភិវឌ្ឍនាពេលអនាគតរបស់ប្រទេសតង់ហ្សានី»។
លោក ហ្សូ ចុងលី (Zhu Chonglie) លេខាធិការនៃគណៈកម្មាធិការទីក្រុងជីនហួ នៃបក្សកុម្មុយនិស្តចិន បានសង្កត់ធ្ងន់លើទំនាក់ទំនងមិត្តភាពជាប្រពៃណីរវាងប្រទេសចិន និងតង់ហ្សានី។ លោកបានមានប្រសាសន៍ថា វេទិកានេះមានគោលបំណងចូលរួមចំណែក ក្នុងការកសាងសហគមន៍ចិន-អាហ្វ្រិកកម្រិតកំពូលឱ្យកាន់តែជិតស្និទ្ធជាមួយនឹងអនាគតរួមគ្នា។
នៅក្នុងការបិទវេទិកានេះ អនុប្រធានាធិបតីតង់ហ្សានី លោក ពីលីព ប៉ាន់ហ្គោ (Philip Mpango) បានលើកឡើងពីតួនាទីដ៏យូរអង្វែងរបស់ប្រទេសចិន ក្នុងនាមជាអ្នកវិនិយោគយុទ្ធសាស្ត្រឈានមុខគេ និងជាដៃគូពាណិជ្ជកម្មដ៏សំខាន់របស់ប្រទេសតង់ហ្សានី។ លោកបានកត់សម្គាល់ថា ការវិនិយោគផ្ទាល់ពីបរទេស និងពាណិជ្ជកម្ម ដែលមានការកើនឡើងបង្ហាញថាប្រទេសតង់ហ្សានីជាទិសដៅវិនិយោគដ៏ល្អសម្រាប់វិនិយោគិនចិន។
ក្នុងវេទិកានេះ អនុស្សរណៈនៃការយោគយល់ចំនួន ៤ ត្រូវបានចុះហត្ថលេខារវាងសហគ្រាសចិន និងតង់ហ្សានី ក៏ដូចជារវាងស្ថាប័នសាធារណៈប្រទេសចិន និងតង់ហ្សានី៕
ប្រភព៖ AKP
