បរទេស៖ រដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ បាននិយាយដោយមានមតិយោបល់ទាក់ទងនឹងជម្លោះរវាងអ៊ីស្រាអែល និងប៉ាឡេស្ទីន ថា ប្រទេសរុស្ស៊ីមិនគាំទ្រអំពើភេរវកម្មក្នុងទម្រង់ណាមួយឡើយ ប៉ុន្តែការប្រយុទ្ធប្រឆាំងនឹងអំពើរភេរវកម្មនោះក៏មិនគួរបំពានទៅលើច្បាប់មនុស្សធម៌ដែរ។
អ្នកការទូតកំពូលរបស់រុស្ស៊ីរូបនេះ បានចង្អុលបង្ហាញនៅក្នុងកិច្ចប្រជុំជាមួយសមភាគីរបស់គាត់មកពីសម្ព័ន្ធអារ៉ាប់ និងអង្គការនៃរដ្ឋជាសមាជិកមួយចំនួននៃកិច្ចសហប្រតិបត្តិការអ៊ីស្លាម ថា «ខ្ញុំសូមបញ្ជាក់ឡើងវិញថា យើងសូមថ្កោលទោសរាល់ទម្រង់នៃអំពើភេរវកម្ម ប៉ុន្តែនៅពេលនិយាយអំពីការប្រយុទ្ធប្រឆាំងនឹងអំពើភេរវកម្ម ចាំបាច់ត្រូវប្រើវិធីសាស្រ្តដែលមិនបង្ហាញពីការដាក់ទណ្ឌកម្មរួម ឬដំណើរការផ្ទុយនឹងច្បាប់មនុស្សធម៌អន្តរជាតិ ឬត្រូវនិយាយដោយត្រង់ទៅត្រង់មក»។
ភាពតានតឹងនៅមជ្ឈិមបូព៌ាបានផ្ទុះឡើងម្តងទៀតបន្ទាប់ពីក្រុមសកម្មប្រយុទ្ធហាម៉ាស់បានជ្រៀតចូលអ៊ីស្រាអែលពីតំបន់ហ្គាហ្សាស្ទ្រីបកាលពីថ្ងៃទី៧ ខែតុលា ដោយបានសម្លាប់អ្នករស់នៅតាមព្រំដែន និងចាប់មនុស្សធ្វើជាចំណាប់ខ្មាំង។ ចលនាប៉ាឡេស្ទីននោះបានពណ៌នាការវាយប្រហាររបស់ខ្លួនថា ជាការឆ្លើយតបទៅនឹងសកម្មភាពរបស់អាជ្ញាធរអ៊ីស្រាអែលដែលប្រឆាំងនឹងវិហារអ៊ីស្លាមអាល់-អាកសា នៅក្នុងទីក្រុងហ្សេរុយសាឡឹម។ ប្រទេសអ៊ីស្រាអែលបានប្រកាសបិទតំបន់ហ្គាហ្សាទាំងស្រុង ហើយបានចាប់ផ្តើមធ្វើការវាយប្រហារទៅលើតំបន់ប៉ាឡេស្ទីន ព្រមទាំងតំបន់មួយចំនួនក្នុងប្រទេសលីបង់ និងស៊ីរី៕
ប្រភព៖ AKP
