បរទេស៖ ក្រសួងសុខភាពសាធារណៈរបស់ប្រទេសថៃ បានបើកយុទ្ធនាការ «ផ្តល់កំណើតពិភពលោកដ៏អស្ចារ្យ» ដើម្បីលើកទឹកចិត្តដល់ប្តីប្រពន្ធឱ្យមានកូន និងជំរុញអត្រាកំណើតទាបគួរឱ្យបារម្ភរបស់ប្រទេសនេះ កាលពីនៅថ្ងៃទី១៦ ខែវិច្ឆិកា។
ថ្លែងនៅក្នុងពិធីដាក់ចេញនូវយុទ្ធនាការនោះ រដ្ឋមន្ត្រីក្រសួងសុខភាពសាធារណៈ លោក ចុលណាន ស្រ៊ីកែវ បាននិយាយថា យុទ្ធនាការនោះស្វែងរកការលើកកម្ពស់ភាពជាឪពុកម្តាយក្នុងចំណោមគូស្វាមីភរិយាវ័យក្មេង ខណៈដែលពួកគេជាច្រើនកំពុងជ្រើសរើសការពន្យារកំណើត ឬសម្រេចចិត្តប្រឆាំងនឹងការមានកូនដោយហេតុផលផ្សេងៗ។
លោកបានអំពាវនាវដល់គូស្នេហ៍ទាំងឡាយឱ្យរំសាយជំនឿដែលថា ការមានកូនច្រើននឹងធ្វើឱ្យអ្នកក្រ ជាពិសេសក្នុងចំណោមអ្នកដែលមានសេដ្ឋកិច្ចសង្គមខ្ពស់ ។
លោករដ្ឋមន្ត្រីបានសង្កត់ធ្ងន់ថា ការធ្វើឱ្យប្រសើរឡើងនូវអត្រាកំណើតទាបរបស់ប្រទេសថៃឥឡូវនេះ ជាចំណុចអាទិភាពក្នុងរបៀបវារៈរបស់រដ្ឋាភិបាល។
លោកបាននិយាយបន្ថែមថា ប្រសិនបើនិន្នាការបច្ចុប្បន្ននៅតែបន្ត ប្រទេសថៃមើលទៅនឹងក្លាយជាប្រទេសមួយក្នុងចំណោមប្រទេសទាំង២៣ នៅលើពិភពលោក ដែលចំនួនប្រជាជននឹងធ្លាក់ចុះក្នុងរយៈពេលពីរបីទសវត្សរ៍ខាងមុខ។
យោងតាមក្រសួងនោះបានឱ្យដឹងថា មានទារកប្រមាណជិត ៥០០.០០០នាក់បានកើតកាលពីឆ្នាំមុននៅក្នុងប្រទេសថៃ ដែលជាចំនួនទាបបំផុតក្នុងរយៈពេល ៧០ឆ្នាំកន្លងមក។
ដើម្បីបង្កើនអត្រាកំណើតរបស់ជាតិ ក្រសួងក៏នឹងបង្កើតមជ្ឈមណ្ឌលសម្ភពចំនួន ១១៩កន្លែងនៅទូទាំងប្រទេស ដោយក្នុងនោះមាន ១២កន្លែងនៅតាមគ្លីនិកសុខភាពសាធារណៈខេត្ត ដែលគ្រប់គ្រងដោយមន្ទីរសុខាភិបាល ១៦កន្លែងនៅតាមមន្ទីរពេទ្យរដ្ឋ និង ៩១កន្លែងនៅតាមមន្ទីរពេទ្យឯកជន។ គ្លីនិកនានាក៏នឹងអាចផ្តល់ដំបូន្មាន និងការព្យាបាលដល់អ្នកដែលមានបញ្ហាបន្តពូជផងដែរ៕
ប្រភព៖ AKP
