បរទេស៖ ទីភ្នាក់ងារស្បៀងអាហារជាតិ (Bapanas) របស់ប្រទេសឥណ្ឌូណេស៊ី បាននិយាយថា តម្លៃម្ហូបអាហារត្រូវបានគេរំពឹងថានឹងនៅតែខ្ពស់សម្រាប់រយៈពេលដែលនៅសល់នៃឆ្នាំនេះ ដោយសារតែបាតុភូតអាកាសធាតុអ៊ែលនីណូ ដែលប៉ះពាល់ដល់ផលិតកម្មនៅក្នុងប្រទេសឥណ្ឌូណេស៊ី និងប្រទេសដទៃទៀត។
ប្រធានទីភ្នាក់ងារ Bapanas លោក អារីហ្វ ប្រាសេតយ៉ូ អាឌី បាននិយាយថា រដ្ឋាភិបាលឥណ្ឌូណេស៊ីនឹងបន្តកិច្ចខិតខំប្រឹងប្រែងរបស់ខ្លួនដើម្បីគ្រប់គ្រងតម្លៃម្ហូបអាហារ រួមទាំងធានាឱ្យបាននូវការនាំចូលបន្ថែមទៀតនូវទំនិញប្រឈមពិសេសចំនួនបី គឺអង្ករ ពោត និងស្ករ។
លោកបានកត់សម្គាល់ថា រដ្ឋាភិបាលបានចាត់ឱ្យទីភ្នាក់ងារភស្តុភាររដ្ឋ (Bulog) នាំចូលអង្ករចំនួន ៣,៥លានតោនក្នុងឆ្នាំនេះ ដើម្បីបង្កើនស្តុករបស់រដ្ឋាភិបាល និងបានយល់ព្រមលើកលែងពន្ធនាំចូលរហូតដល់ ៤៥០រូពៀ (០,០២៩ដុល្លារអាម៉េរិក) ក្នុងមួយគីឡូក្រាមសម្រាប់បរិមាណនៃអង្ករនាំចូលនេះ។
លោកបាននិយាយបន្តថា កិច្ចខិតខំប្រឹងប្រែងផ្សេងទៀតក្នុងការជំរុញផលិតកម្មក៏កំពុងដំណើរការផងដែរ ដែលរួមមានផែនការពន្លឿនការដាំដុះស្រូវ និងបង្កើនការផ្គត់ផ្គង់ជីជាដើម។
យោងតាមការិយាល័យស្ថិតិឥណ្ឌូណេស៊ី (BPS) បានឱ្យដឹងថា ផលិតកម្មស្រូវរបស់ប្រទេសឥណ្ឌូណេស៊ីត្រូវបានគេរំពឹងថានឹងថយចុះចំនួន ៦៥០.០០០តោននៅក្នុងឆ្នាំនេះ ដោយមានត្រឹម ៣០,៩លានតោន។ ទិន្នន័យរបស់ការិយាល័យ BPS នៅដើមខែវិច្ឆិកាក៏បានបង្ហាញផងដែរថា អង្ករ គឺជាមូលហេតុចម្បងនៃអតិផរណាខ្ពស់ក្នុងខែតុលា ដែលមានរហូតដល់ ២,៥៦% ពីចំនួន ២,២៨% កាលពីមួយខែមុន។
លោក អារីហ្វ បាននិយាយថា ដើម្បីរក្សាស្ថិរភាពតម្លៃពោត រដ្ឋាភិបាលឥណ្ឌូណេស៊ីនឹងនាំចូលពោតចំនួន ៥០០.០០០តោន ដោយលោកបាននិយាយបន្ថែមថា ពាក់កណ្តាលនៃចំនួននាំចូលនេះ ត្រូវបានគេរំពឹងថានឹងត្រូវដឹកជញ្ជូននៅមុនដំណាច់ឆ្នាំនេះ។
លោក អារីហ្វ បាននិយាយថា បើគ្មានការអន្តរាគមន៍ក្នុងការផ្គត់ផ្គង់ក្នុងស្រុកទេ តម្លៃអាហារផ្សេងទៀតដូចជាស៊ុត និងសាច់មាន់ក៏នឹងកើនឡើងផងដែរ ដោយសារតែតម្រូវការខ្ពស់ ចំពេលដែលទិន្នផលមានការធ្លាក់ចុះ៕
ប្រភព៖ AKP
