បរទេស៖ អ្នកនាំពាក្យរបស់ចលនាហាម៉ាស់ លោក ហ្វាវហ្ស៊ី បាហ៊ូម បាននិយាយថា ចលនារ៉ាឌីកាល់ប៉ាឡេស្ទីនហាម៉ាស់ បានស្នើឱ្យប្រទេសអេហ្ស៊ីបផ្តល់សេវារ៉ូមីងទៅកាន់តំបន់ហ្គាហ្សាស្ទ្រីប ដែលនៅទីនោះ ការទំនាក់ទំនងតាមទូរស័ព្ទ និងប្រព័ន្ធអ៊ីនធើណេតត្រូវបានកាត់ផ្តាច់។
អ្នកនាំពាក្យនោះបាននិយាយនៅក្នុងសេចក្តីថ្លែងការណ៍ដែលបានចុះផ្សាយនៅក្នុងបណ្តាញតេឡេក្រាមផ្លូវការរបស់ក្រុមនោះថា «ការកាន់កាប់របស់ពួកភេរវករ Zionist បានកាត់ផ្តាច់សេវា [ទូរស័ព្ទ] និងប្រព័ន្ធអ៊ីនធើណេតនៅក្នុងតំបន់ហ្គាហ្សាស្ទ្រីប។ យើងអំពាវនាវឱ្យប្រទេសអេហ្ស៊ីបបើកសេវារ៉ូមីងនៅលើបណ្តាញអេហ្ស៊ីប»។
កាលពីថ្ងៃទី០៥ ខែវិច្ឆិកា អ្នកផ្តល់សេវា Paltel របស់ប៉ាឡេស្ទីន បានរាយការណ៍ថា សេវាទូរស័ព្ទ និងប្រព័ន្ធអ៊ីនធើណេតត្រូវបានរំខានម្តងទៀតនៅទូទាំងតំបន់ហ្គាហ្សាស្រ្ទីប។ ការប្រកាសស្រដៀងគ្នានេះក៏ត្រូវបានធ្វើឡើងផងដែរ ដោយក្រុមហ៊ុន Jawwal ដែលជាអ្នកផ្តល់សេវាទូរគមនាគមន៍ទីពីរនៅតំបន់ហ្គាហ្សា។
ការបិទទាំងស្រុងនៃសេវាអ៊ិនធើណេត ខ្សែទូរស័ព្ទ និងការតភ្ជាប់ខ្សែបណ្តាញនៅក្នុងតំបន់ប៉ាឡេស្ទីនត្រូវបានរាយការណ៍ជាលើកដំបូងនៅថ្ងៃទី២៧ ខែតុលា។ ក្រុមហ៊ុន Paltel និងក្រុមហ៊ុន Jawwal បាននិយាយថា សេវាកម្មបានក្លាយទៅជាមិនអាចទៅរួចនោះទេដោយសារតែការខូចខាតដល់ទំនាក់ទំនងដែលបណ្តាលមកពីការវាយប្រហារតាមអាកាសរបស់អ៊ីស្រាអែល។ ការទំនាក់ទំនងត្រូវបានស្តារឡើងវិញនៅថ្ងៃទី៣១ ខែតុលា ខណៈដែលអង្គការអន្តរជាតិបានសម្តែងការព្រួយបារម្ភអំពីអសមត្ថភាពក្នុងការទំនាក់ទំនងទៅអ្នកដែលនៅសេសសល់នៅក្នុងតំបន់ហ្គាហ្សា៕
ប្រភព៖ AKP
