បរទេស៖ នាយកដ្ឋានរដ្ឋបាលខេត្ត (DPA) នៃក្រសួងមហាផ្ទៃនៃប្រទេសថៃ បានបង្កើតក្រុមការងារកណ្តាលមួយ ដើម្បីពង្រឹងការអនុវត្តច្បាប់ប្រឆាំងនឹងឧក្រិដ្ឋជន រាប់ចាប់តាំងពីអ្នកជួញដូរគ្រឿងញៀនរហូតដល់ប្រតិបត្តិករក្លឹបរាត្រី។
លេខាធិការអចិន្ត្រៃយ៍នៃក្រសួងមហាផ្ទៃថៃ លោក ស៊ុធីពង្ស ជុលចារើន បាននិយាយថា ប្រតិបត្តិការទូទាំងប្រទេសថ្មីនេះនឹងចាប់ផ្តើមនៅថ្ងៃទី១ ខែវិច្ឆិកា ហើយវាជាផ្នែកមួយនៃគោលនយោបាយស្នូលដែលណែនាំដោយរដ្ឋមន្ត្រីក្រសួងមហាផ្ទៃ លោក អានុទីន ចាន់វីរៈគុល ដើម្បីធានាបាននូវច្បាប់ និងសណ្តាប់ធ្នាប់។
លោកបាននិយាយតាមសន្និសីទវីដេអូមួយជាមួយបណ្តាអភិបាលខេត្តកាលពីថ្ងៃទី២៨ ខែតុលាថា ខេត្តនីមួយៗក៏អាចបង្កើតក្រុមការងាររបស់ខ្លួនដើម្បីគាំទ្រដល់អង្គភាពកណ្តាលនេះផងដែរ។
លោកបានកត់សម្គាល់ថា ទំនួលខុសត្រូវស្នូលរបស់ក្រុមការងារថ្មីនេះ រួមមានការត្រួតពិនិត្យអាជីវកម្មកម្សាន្តពេលយប់ ដើម្បីធានាថាពួកគេគោរពយ៉ាងតឹងរ៉ឹងជាមួយម៉ោងបិទ ការពង្រឹងអាយុអប្បបរមាសម្រាប់ថៅកែ ការហាមឃាត់ការប្រើប្រាស់គ្រឿងញៀននៅក្នុងគ្រឹះស្ថានទាំងនោះ និងការហាមឃាត់អាវុធ និងល្បែងស៊ីសងក្នុងបរិវេណក្លឹបទាំងនោះ។
អាជីវកម្មកម្សាន្តណាដែលដំណើរការដោយគ្មានការអនុញ្ញាតត្រឹមត្រូវ ច្បាស់ជាប្រឈមនឹងការបង្រ្កាបយ៉ាងតឹងរ៉ឹង។
លោកបាននិយាយបន្ថែមថា ក្រុមការងារនេះក៏នឹងគាំទ្រដល់ការបង្រ្កាបសកម្មភាពឧក្រិដ្ឋកម្មទូទាំងប្រទេសរបស់ក្រសួង ដោយរក្សាការឃ្លាំមើលយ៉ាងដិតដល់ចំពោះមនុស្សមួយចំនួនដែលមានឈ្មោះថាជាអ្នកមានឥទ្ធិពល។
នៅពេលមុននេះ លោករដ្ឋមន្ត្រី អានុទីន បានបញ្ជាឱ្យមន្ត្រីចងក្រងមូលដ្ឋានទិន្នន័យ ស្តីពីជនខិលខូចដែលមានឥទ្ធិពលនៅទូទាំងប្រទេស។ យោងតាមលោក ស៊ុធីពង្ស បានឱ្យដឹងថា ប្រជាជនក៏ត្រូវបានលើកទឹកចិត្តឱ្យផ្តល់ព័ត៌មានបន្ថែមទៀតដល់ក្រសួង អំពីសកម្មភាពខុសច្បាប់ និងតាមរយៈការបញ្ជូនព័ត៌មានទៅកាន់មជ្ឈមណ្ឌលរបស់ក្រសួងសម្រាប់ការទទួល និងដោះស្រាយបណ្តឹងនៅទូទាំងប្រទេស៕
ប្រភព៖ AKP
