អនុប្រធានាធិបតីចិនជួបពិភាក្សាជាមួយប្រធានសភាតំណាងប្រទេសប្រេស៊ីល

បរទេស៖ អនុប្រធានាធិបតីចិន លោក ហាន់ ហ្សេង កាលពីថ្ងៃព្រហស្បតិ៍ បានជួបជាមួយប្រធានសភាតំណាងប្រទេសប្រេស៊ីល លោក អាធួ លីរ៉ា ក្នុងទីក្រុងប៉េកាំង។

លោក ហាន់ បាននិយាយថា ភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន-ប្រេស៊ីល បានរក្សាការអភិវឌ្ឍប្រកបដោយភាពល្អប្រសើរ និងមានស្ថិរភាព ហើយនាំមកនូវផលប្រយោជន៍ជាក់ស្តែងដល់ប្រជាជនទាំងពីរ។

លោក ហាន់ បាននិយាយថា ប្រទេសចិននឹងធ្វើការងារជាមួយប្រទេសប្រេស៊ីល ដើម្បីអនុវត្តការឯកភាពដ៏សំខាន់ដែលសម្រេចបានដោយប្រមុខរដ្ឋទាំងពីរ ពង្រឹងការជឿទុកចិត្តគ្នាទៅវិញទៅមកខាងផ្នែកនយោបាយ ជំរុញកិច្ចសហប្រតិបត្តិការខ្សែក្រវាត់ និងផ្លូវប្រកបដោយគុណភាពខ្ពស់ ពង្រីកការផ្លាស់ប្តូររវាងប្រជាជន និងប្រជាជន បង្កើនការសម្របសម្រួលលើបញ្ហាអន្តរជាតិ និងការពារផលប្រយោជន៍រួម ដោយលោកបាននិយាយបន្ថែមថា ប្រទេសចិនបានត្រៀមខ្លួនរួចជាស្រេចក្នុងការធ្វើការងារជាមួយបណ្តាប្រទេសផ្សេងៗទៀត រួមទាំងប្រទេសប្រេស៊ីលផងដែរ ដើម្បីកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ។

លោក លីរ៉ា បាននិយាយថា វាគឺជាសេចក្តីប្រាថ្នារួមរបស់គ្រប់វិស័យនៃសង្គមប្រេស៊ីលក្នុងការពង្រឹងទំនាក់ទំនងជាមួយប្រទេសចិន ហើយសភាតំណាងប្រទេសប្រេស៊ីលនឹងរួមចំណែកដល់កិច្ចសហប្រតិបត្តិការមិត្តភាពរវាងប្រទេសទាំងពីរ៕

ប្រភព៖ AKP