បរទេស៖ អាជ្ញាធរនៃរដ្ឋធានីវៀងច័ន្ទន៍របស់ឡាវ បានជំរុញឱ្យវិស័យឯកជនសហការក្នុងការអនុវត្តវិធានការបន្ទាន់ដើម្បីដោះស្រាយការលំបាកផ្នែកសេដ្ឋកិច្ច និងហិរញ្ញវត្ថុទាក់ទងនឹងអតិផរណា ការកើនឡើងអត្រាប្តូរប្រាក់ និងបំណុលបរទេស។
តំណាងរដ្ឋាភិបាល និងវិស័យធុរកិច្ច បានបើកកិច្ចប្រជុំមួយនៅទីក្រុងវៀងចន្ទន៍កាលពីថ្ងៃទី១៧ ខែតុលា ដើម្បីពិភាក្សា និងផ្លាស់ប្តូរយោបល់គ្នាអំពីការស្វែងរកដំណោះស្រាយចំពោះការលំបាកផ្នែកសេដ្ឋកិច្ច និងហិរញ្ញវត្ថុ។
អភិបាលទីក្រុងវៀងច័ន្ទន៍ លោក អាតសាផាងថុង ស៊ីផាន់ដន ដែលធ្វើជាប្រធាននៃកិច្ចប្រជុំនោះបាននិយាយថា ប្រទេសឡាវ ជាពិសេសរដ្ឋធានីវៀងច័ន្ទន៍ កំពុងប្រឈមមុខនឹងអតិផរណា អត្រាប្តូរប្រាក់កើនឡើង តម្លៃទំនិញខ្ពស់ និងប្រាក់គីបចុះខ្សោយ។
លោក អាតសាផាងថុង បាននិយាយបន្តទៀតថា គួរតែមានកិច្ចសហប្រតិបត្តិការរឹងមាំរវាងរដ្ឋាភិបាល និងវិស័យឯកជន ទៅលើវិធានការ និងយន្តការនានា ដើម្បីដោះស្រាយបញ្ហាទាំងនេះ។
យោងតាមវិទ្យាស្ថានវិទ្យាសាស្ត្រសង្គម និងសេដ្ឋកិច្ចទីក្រុងវៀងចន្ទន៍ បានឱ្យដឹងថា អតិផរណា និងការលំបាកផ្នែកសេដ្ឋកិច្ចសង្គម អាចដោះស្រាយបានដោយការផ្លាស់ប្តូរចិត្តសាស្ត្ររបស់មនុស្ស ការគិតប្រាក់ថ្លៃដើមសម្រាប់ផលិតផលបរទេស ការបង្កើនការប្រើប្រាស់ផលិតផល និងសេវាកម្មក្នុងស្រុក និងការលើកកម្ពស់វិស័យទេសចរណ៍ដើម្បីទាក់ទាញភ្ញៀវទេសចរឱ្យបានកាន់តែច្រើន។
វិទ្យាស្ថាននោះបាននិយាយថា ការផលិតទំនិញក្នុងស្រុកគួរតែត្រូវបានលើកកម្ពស់ដើម្បីបំពេញតម្រូវការប្រចាំថ្ងៃ បង្កើនផលិតកម្មកសិកម្ម និងកាត់បន្ថយថ្លៃដើមផលិតកម្មក្នុងស្រុក ដោយបាននិយាយបន្ថែមថា រដ្ឋាភិបាលគួរតែជំរុញគោលនយោបាយកាត់បន្ថយថ្លៃអគ្គិសនីសម្រាប់គ្រួសារ ប្រព័ន្ធធារាសាស្រ្ត និងកសិកម្ម។
វាគួរតែមានគោលនយោបាយហិរញ្ញវត្ថុតឹងរ៉ឹងដើម្បីកាត់បន្ថយឱនភាព និងសម្រាប់ការនាំចូលតែអ្វីដែលត្រូវការចាំបាច់៕
ប្រភព៖ AKP
