បរទេស៖ ការនាំចេញរបស់ថៃក្នុងឆ្នាំ២០២៤ ទំនងជានឹងងើបឡើងវិញដល់កំណើន ៣,៦% ពីការធ្លាក់ចុះដែលបានព្យាករណ៍ចំនួន ២% នៅក្នុងឆ្នាំនេះ។ នេះបើយោងតាមការព្យាករលើកចុងក្រោយដោយសាកលវិទ្យាល័យសភាពាណិជ្ជកម្មថៃ (UTCC)។
ប្រធានសាកលវិទ្យាល័យ UTCC លោក ថាណាវ៉ាត់ ផុនវីឆៃ បានសន្មតថា ការព្យាករនេះជាការបន្ធូរបន្ថយអតិផរណា និងអត្រាការប្រាក់ទាបនៅក្នុងប្រទេសផ្សេងៗ ដែលគួរតែបង្កើនតម្រូវការសម្រាប់ទំនិញ។
លោកបាននិយាយថា ទីភ្នាក់ងាររដ្ឋាភិបាលថៃក៏គ្រោងនឹងដាក់ចេញនូវគោលនយោបាយនៅក្នុងឆ្នាំក្រោយដើម្បីបង្កើនការនាំចេញទៅកាន់ទីផ្សារផ្សេងៗ ដូចជាការប្រើប្រាស់ថាមពលទន់ ដើម្បីបន្ថែមតម្លៃដល់ការដឹកជញ្ជូន ការដោះស្រាយរបាំងពាណិជ្ជកម្មតាមព្រំដែន និងការប្រើប្រាស់កាន់តែច្រើននៃកិច្ចព្រមព្រៀងពាណិជ្ជកម្មសេរីផងដែរ។
ការនាំចេញរបស់ប្រទេសថៃកំពុងងើបឡើងវិញនៅត្រីមាសទី៤ នៃឆ្នាំនេះ ដោយបង្ហាញពីកំណើនជាបណ្តើរៗ និងជាប់លាប់។ លោកបាននិយាយបន្ថែមថា ការងើបឡើងវិញត្រូវបានគេរំពឹងថានឹងកាន់តែមានភាពច្បាស់លាស់នៅពាក់កណ្តាលឆ្នាំ២០២៤ ហើយយើងជឿជាក់ថា ការនាំចេញនឹងរួមចំណែកយ៉ាងសំខាន់ដល់សេដ្ឋកិច្ចប្រទេសថៃនៅឆ្នាំក្រោយ។
លោកបាននិយាយថា គម្រោងជំរុញសេដ្ឋកិច្ចដ៏សំខាន់នៅឆ្នាំក្រោយនេះ គឺជាការគ្រោងទុកពីការប្រើប្រាស់កាបូបប្រាក់ឌីជីថល។ សាកលវិទ្យាល័យ UTCC បានរំពឹងថា សេដ្ឋកិច្ចប្រទេសថៃនឹងកើនឡើងពី ៤,៥% ទៅ ៥% ក្នុងឆ្នាំ២ឥ២៤ ប៉ុន្តែទោះយ៉ាងណាក៏ដោយ នៅតែមានហានិភ័យមួយចំនួនសម្រាប់វិស័យនាំចេញនៅឆ្នាំក្រោយដែរ ដោយសារលក្ខខណ្ឌសេដ្ឋកិច្ចពិភពលោកមិនច្បាស់លាស់។
ទាំងមូលនិធិរូបិយវត្ថុអន្តរជាតិ (IMF) និងអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) បានព្យាករណ៍ពីការធ្លាក់ចុះនៃសេដ្ឋកិច្ចពិភពលោកក្នុងឆ្នាំ២០២៤។ មូលនិធិ IMF បានព្យាករណ៍ថា កំណើនសេដ្ឋកិច្ចពិភពលោកនឹងកើនឡើង ២,៩% នៅឆ្នាំក្រោយ ដោយធ្លាក់ចុះពី ៣% នៅក្នុងឆ្នាំនេះ ខណៈដែលអង្គការ OECD រំពឹងថានឹងមានកំណើន ២,៧% ដោយធ្លាក់ចុះពី ៣% នៅក្នុងឆ្នាំនេះ៕
ប្រភព៖ AKP
