បរទេស៖ ប្រធានទីភ្នាក់ងារស្បៀងអាហារជាតិរបស់ប្រទេសឥណ្ឌូណេស៊ី (Bapanas) លោក អារីហ្វ ប្រាសេតយ៉ូ អាឌី បាននិយាយថា រដ្ឋាភិបាលឥណ្ឌូណេស៊ីកំពុងអនុវត្តវិធានការមួយចំនួន រួមទាំងជំនួយស្បៀងអាហារ ដើម្បីទប់ទល់នឹងនិន្នាការកើនឡើងនៃតម្លៃអង្ករ។
យោងតាមលោក អារីហ្វ បានឱ្យដឹងថា អង្ករប្រហែល ៦៤០តោនត្រូវបានចែកចាយទៅឱ្យគ្រួសារអ្នកទទួលផលចំនួន ២១,៣លាននាក់ក្នុងរយៈពេល ៣ខែ។
លោកបានបញ្ជាក់ថា ភារកិច្ចនេះត្រូវបានផ្តល់ដោយលោកប្រធានាធិបតីឥណ្ឌូណេស៊ីទៅឱ្យទីភ្នាក់ងារ Bapanas និងទីភ្នាក់ងារភស្តុភារជាតិ (Bulog)។ នេះជាភារកិច្ចជាតិដើម្បីធានាដល់ជីវភាពរស់នៅរបស់ប្រជាជន។
លោកបានចង្អុលបង្ហាញថា ទីភ្នាក់ងារ Bapanas ក៏កំពុងដំណើរការកម្មវិធីផ្គត់ផ្គង់ស្បៀងអាហារ និងស្ថិរភាពតម្លៃ (SPHP) ដែលពាក់ព័ន្ធនឹងការចែកចាយអង្ករគុណភាពខ្ពស់តម្លៃសមរម្យតាមរយៈហាងលក់រាយទំនើប និងទីផ្សារប្រពៃណីផងដែរ។
លោក អាឌី បានកត់សម្គាល់បន្ថែមទៀតថា លោកប្រធានាធិបតី ចូកូ វីដូដូ បានណែនាំដល់ទីភ្នាក់ងារ Bulog ឱ្យចែកចាយអង្ករចំនួន ២០០.០០០តោន តាមរយៈរោងម៉ាស៊ីនកិនស្រូវនៅទូទាំងប្រទេស ដើម្បីធ្វើមានស្ថិរភាពតម្លៃ៕
ប្រភព៖ AKP
