បរទេស៖ កងទ័ពជើងទឹកនៃប្រទេសអូស្ត្រាលី កាណាដា បារាំង ជប៉ុន និងចក្រភពអង់គ្លេស កំពុងចូលរួមក្នុងថ្ងៃទី២ នៃសមយុទ្ធសមុទ្ររួមគ្នារវាងសហរដ្ឋអាមេរិក និងហ្វីលីពីន សាម៉ាសាម៉ា ឆ្នាំ២០២៣ ខណៈដែលប្រទេសឥណ្ឌូណេស៊ី និងនូវែលសេឡង់កំពុងចូលរួមក្នុងនាមជាអ្នកសង្កេតការណ៍។ នេះបើយោងតាមកាសែត The Manila Times បានរាយការណ៍កាលពីថ្ងៃអង្គារ។
សមយុទ្ធយោធាពហុភាគីឆ្នាំ២០២៣ នេះ កំពុងធ្វើឡើងនៅជិតកោះលូហ្សូន ចាប់ពីថ្ងៃទី០២ ដល់ថ្ងៃទី១៣ ខែតុលា។
មេបញ្ជាការកងទ័ពជើងទឹកហ្វីលីពីន លោក តូរីប៊ីអូ អាដាស៊ី ជេអ. ត្រូវបានដកស្រង់សម្តីដែលបាននិយាយថា សមយុទ្ធនេះមានគោលបំណងបង្កើនអន្តរប្រតិបត្តិការ ជំរុញកិច្ចសហប្រតិបត្តិការក្នុងតំបន់ និងដោះស្រាយបញ្ហាប្រឈមដែលមិនមែនជាប្រពៃណីដែលហួសព្រំដែនរបស់យើង ខណៈដែលមេបញ្ជាការកងនាវាចរទី៧ របស់សហរដ្ឋអាមេរិក លោក ខាល ថូម៉ាស់ បាននិយាយថា សមយុទ្ធនេះបានធ្វើឱ្យអ្នកចូលរួមរបស់ខ្លួនទទួលបានការហ្វឹកហាត់ និងបង្ហាញពីការតាំងចិត្តរបស់យើង ពង្រឹងសមត្ថភាពរបស់យើង និងពង្រឹងអន្តរប្រតិបត្តិការរបស់យើង។
យោងតាមការរាយការណ៍នោះបានឱ្យដឹងថា ការផ្តោតសំខាន់ គឺសមយុទ្ធការពារដែនអាកាសដែលពាក់ព័ន្ធនឹងឧទ្ធម្ភាគចក្រដែលកំពុងហ្វឹកហាត់ចុះចតលើប្រភេទនាវាផ្ទុកយន្តហោះផ្សេងៗគ្នា និងការតាមដាន និងកំណត់អត្តសញ្ញាណយន្តហោះដែលហោះមកជិត។
អ្នកនាំពាក្យកងកម្លាំងទ័ពជើងទឹកហ្វីលីពីន លោក គីម ផូឡូ ឡូប៉េហ្ស បាននិយាយនៅក្នុងសេចក្តីថ្លែងការណ៍មួយថា សមយុទ្ធនេះក៏ពាក់ព័ន្ធនឹងសមាសធាតុសង្គ្រាមប្រឆាំងនាវាមុជទឹកផងដែរ។
សមយុទ្ធសាម៉ាសាម៉ានៅក្នុងឆ្នាំនេះ កំពុងត្រូវបានធ្វើឡើងចំពេលដែលកំពុងមានភាពតានតឹងរវាងហ្វីលីពីន និងចិននៅក្នុងដែនទឹកជម្លោះនៃសមុទ្រចិនខាងត្បូង ដែលកាលពីថ្ងៃទី០៤ ខែតុលា នាវាហ្វីលីពីនបានបញ្ចប់បេសកកម្មផ្គត់ផ្គង់ឡើងវិញ បើទោះបីជាមានការប៉ុនប៉ងរារាំងដោយឆ្មាំឆ្នេរសមុទ្រចិនក៏ដោយ៕
ប្រភព៖ ទីភ្នាកង់ារសារព័ត៌មានកម្ពុជា
