បរទេស៖ ក្រសួងសន្តិសុខសាធារណៈចិនបានប្រកាសកាលពីថ្ងៃចន្ទថា ការបង្ក្រាបបានធ្វើជាបន្តបន្ទាប់ទៅលើករណីបោកប្រាស់តាមប្រព័ន្ធអនឡាញ ដែលមានប្រភពមកពីភាគខាងជើងនៃប្រទេសមីយ៉ាន់ម៉ា និងទាក់ទងនឹងពលរដ្ឋចិន ដោយក្នុងនោះជនសង្ស័យចំនួន ៧០៦នាក់បន្ថែមទៀតត្រូវបានផ្ទេរពីប្រទេសមីយ៉ាន់ម៉ាទៅកាន់មន្ទីរឃុំឃាំងរបស់ប្រទេសចិន។
ជនសង្ស័យទាំងនោះ រួមមានទាំងជនភៀសខ្លួនចំនួន ២៦នាក់ ដែលត្រូវបានប្រគល់ទៅឱ្យអាជ្ញាធរសន្តិសុខសាធារណៈនៅក្នុងទីក្រុងលីនខាង និងទីក្រុងពូអឺ នៃខេត្តយ៉ុនណាន ដែលនៅជាប់ព្រំដែនភាគនិរតីនៃប្រទេសចិន នៅចន្លោះថ្ងៃទី២៥ ខែកញ្ញា ដល់ថ្ងៃទី៧ ខែតុលា។
អាជ្ញាធរចិនបានសន្យាស៊ើបអង្កេតឱ្យបានហ្មត់ចត់ចំពោះសកម្មភាពឧក្រិដ្ឋកម្មរបស់ជនសង្ស័យ និងបង្ក្រាបការបោកប្រាស់តាមប្រព័ន្ធអនឡាញ ដោយប្រកាន់ខ្ជាប់យ៉ាងតឹងរ៉ឹងចំពោះច្បាប់។ ពួកគេក៏មានគម្រោងចុះស្រាវជ្រាវអំពីឧក្រិដ្ឋកម្មក្នុងស្រុកដែលមានការពាក់ព័ន្ធផងដែរ ដើម្បីធានាឱ្យបាននូវការបង្ក្រាបយ៉ាងទូលំទូលាយនៃសកម្មភាពឧក្រិដ្ឋកម្មនោះ។
ចំនួនករណីបោកប្រាស់តាមប្រព័ន្ធអនឡាញបានធ្លាក់ចុះគួរឱ្យកត់សម្គាល់ក្នុងប៉ុន្មានខែថ្មីៗនេះ ដោយជនសង្ស័យសរុបចំនួន ២.៣១៧នាក់ត្រូវបានចាប់ខ្លួន និងបានផ្ទេរពីប្រទេសមីយ៉ាន់ម៉ាទៅប្រទេសចិន។ នេះបើយោងតាមក្រសួងនោះបានចេញផ្សាយ។
អាជ្ញាធរសន្តិសុខសាធារណៈចិនបានប្តេជ្ញាបន្តកិច្ចខិតខំប្រឹងប្រែងរបស់ខ្លួនក្នុងការបង្ក្រាបករណីបោកប្រាស់តាមប្រព័ន្ធអនឡាញ និងការពារសិទ្ធិ និងផលប្រយោជន៍ស្របច្បាប់របស់ប្រជាពលរដ្ឋ៕
ប្រភព៖ ទីភ្នាក់ងារសារព័ត៌មានកម្ពុជា
