បរទេស៖ ក្រុមប្រឹក្សាសន្តិសុខអង្គការសហប្រជាជាតិបានពិភាក្សាគ្នាអំពីស្ថានភាពជុំវិញតំបន់ហ្គាហ្សាស្ទ្រីប ប៉ុន្តែមិនបានព្យាយាមអនុម័តទៅលើឯកសាររួមណាមួយទេ។ នេះបើយោងតាមអ្នកចូលរួមបាននិយាយបន្ទាប់ពីកិច្ចប្រជុំក្រុមប្រឹក្សានោះ។
អ្នកតំណាងអចិន្ត្រៃយ៍នៃប្រទេសម៉ាល់តា លោកស្រី វ៉ាន់ណេសសា ហ្រ្វាហ្សៀរ បានប្រាប់អ្នកសារព័ត៌មានថា «យើងមិនបានពិភាក្សាអំពីសេចក្តីថ្លែងការណ៍រួមណាមួយទេ ហើយក៏គ្មាននរណាម្នាក់បានស្នើឡើងនូវអត្ថបទណាមួយដែរ»។
លោកស្រីបាននិយាយបន្ថែមថា អ្នកចូលរួមបានពិភាក្សាគ្នាអំពីអ្វីដែលអាចធ្វើបានដើម្បីការពារជនស៊ីវិល និងបញ្ឈប់អំពើហិង្សា។
តំណាងអចិន្ត្រៃយ៍ជំនួសរបស់សហរដ្ឋអាមេរិក លោក រ៉ូបឺត វូដ បានកត់សម្គាល់ថា «សមាជិកក្រុមប្រឹក្សាសន្តិសុខអង្គការសហប្រជាជាតិបានព្រមព្រៀងគ្នាថា ការវាយប្រហារទាំងនោះមិនត្រូវកើតឡើងទេ»។
លោកបានសម្តែងក្តីសង្ឃឹមថា ស្ថានការណ៍នឹងមិនកាន់តែយ៉ាប់យ៉ឺនឡើយ ហើយក្រុមប្រឹក្សាបានប្តេជ្ញាថានឹងធ្វើគ្រប់យ៉ាងដើម្បីការពារកុំឱ្យស្ថានការណ៍មានការរីករាលដាលបន្តទៀត៕
ប្រភព៖ ទីភ្នាក់ងារសារព័ត៌មានកម្ពុជា
