បរទេស៖ រដ្ឋមន្ត្រីមហាសមុទ្រនៃទីក្រុងសេអ៊ូលបាននិយាយថា កូរ៉េខាងត្បូងនឹងពង្រឹងការធ្វើតេស្តសារធាតុវិទ្យុសកម្មក្នុងទឹកសមុទ្រជាបន្ទាន់ តាមរយៈការបន្ថែមតំបន់ឆ្នេរ ដើម្បីបន្ធូរបន្ថយការព្រួយបារម្ភជាសាធារណៈអំពីការបញ្ចេញទឹកកខ្វក់របស់ប្រទេសជប៉ុនពីរោងចក្រថាមពលនុយក្លេអ៊ែរហ្វូគូស៊ីម៉ាចូលទៅក្នុងមហាសមុទ្រ។
កាលពីខែកក្កដា ប្រទេសកូរ៉េខាងត្បូងបានចាប់ផ្តើមធ្វើតេស្តសារធាតុវិទ្យុសកម្មបន្ទាន់ទៅលើសំណាកពីទីតាំងឆ្នេរសមុទ្រសរុបចំនួន៧៥ នៅភាគខាងកើត ដែលរួមមានទាំងភាគខាងលិច និងភាគខាងត្បូងនៃប្រទេសកូរ៉េខាងត្បូង ក៏ដូចជាទឹកដែលចេញពីភាគខាងត្បូងនៃកោះជេជូ។ ប្រហែលមួយខែមុនការចេញផ្សាយរបស់ប្រទេសជប៉ុននៃការកែច្នៃទឹកដែលមានសារធាតុវិទ្យុសកម្មពីរោងចក្រថាមពលនុយក្លេអ៊ែរហ្វូគូស៊ីម៉ាដែលត្រូវបានបំផ្លាញដោយការរញ្ជួយដី និងរលកយក្សស៊ូណាមិកាលពីក្នុងឆ្នាំ២០១១ ចូលទៅក្នុងសមុទ្រ។
រដ្ឋមន្ត្រីមហាសមុទ្រ លោក ចូ ស៊ុងវ៉ាន់ បានប្រាប់ក្រុមអ្នកសារព័ត៌មានកាលពីថ្ងៃព្រហស្បតិ៍ក្នុងអំឡុងពេលនៃដំណើរទស្សនកិច្ចរបស់លោកទៅកាន់កន្លែងសាកល្បងមួយនៅភាគខាងត្បូងកំពង់ផែទីក្រុងប៊ូសានថា «យើងបានជ្រើសរើសកន្លែងទាំងនោះ ដោយសារពួកគេត្រូវបានគេរំពឹងថានឹងមានទឹកដែលត្រូវបានបញ្ចេញជាលើកដំបូងចូលទៅក្នុងចរន្តទឹកសមុទ្រ។ យើងនឹងបន្ថែមទីតាំងទៅក្នុងបញ្ជី ជាពិសេសនៅសមុទ្រខាងកើត ដើម្បីធានាសុវត្ថិភាពបន្ថែមទៀត»។
កាលពីក្នុងខែសីហា ការនាំចូលគ្រឿងសមុទ្ររបស់ប្រទេសកូរ៉េខាងត្បូងបានធ្លាក់ចុះ ៣៤,៨% បើធៀបទៅនឹងឆ្នាំមុន ដែលមានតម្លៃត្រឹម ៧,៨១លានដុល្លារអាម៉េរិក។ នេះបើយោងតាមទិន្នន័យរបស់រដ្ឋាភិបាលកូរ៉េខាងត្បូង។
ប្រទេសកូរ៉េខាងត្បូងបានហាមឃាត់ការនាំចូលអាហារសមុទ្រទាំងអស់ពីខេត្តចំនួន៨ របស់ប្រទេសជប៉ុនដែលនៅជិតរោងចក្រថាមពលនុយក្លេអ៊ែរហ្វូគូស៊ីម៉ាកាលពីក្នុងឆ្នាំ២០១៣ ដោយសារការព្រួយបារម្ភអំពីកម្រិតសារធាតុវិទ្យុសកម្ម បន្ទាប់ពីឧប្បត្តិហេតុក្នុងឆ្នាំ២០១១ និងបានប្តេជ្ញាថានឹងរក្សាការទប់ស្កាត់ការនាំចូលនោះ៕
ប្រភព៖ ទីភ្នាក់ងារសារព័ត៌មានកម្ពុជា
