បរទេស៖ សារព័ត៌មានខាម៉ាបានរាយការណ៍កាលពីថ្ងៃចន្ទថា អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតេរេស បាននិយាយថា ពីរឆ្នាំបានកន្លងផុតទៅចាប់តាំងពីការហាមប្រាមចំពោះការអប់រំសម្រាប់កុមារីនៅក្នុងប្រទេសអាហ្វហ្គានីស្ថាន ហើយការរំលោភសិទ្ធិមនុស្សដ៏អយុត្តិធម៌មួយនេះនៅតែបន្តកើតមាន។
លោក ហ្គូតេរេស បាននិយាយនៅលើវេទិកាប្រព័ន្ធផ្សព្វផ្សាយសង្គមអ៊ិច (X) របស់លោកថា «ពីរឆ្នាំបានកន្លងផុតទៅចាប់តាំងពីមានការហាមឃាត់ក្មេងស្រីចូលរៀននៅក្នុងសាលារៀនក្នុងប្រទេសអាហ្វហ្គានីស្ថាន។ នេះជាការរំលោភសិទ្ធិមនុស្សមិនសមហេតុផលមួយ ដែលបង្កការខូចខាតរយៈពេលយូរទៅលើប្រទេសទាំងមូល»។
សារព័ត៌មានខាម៉ាបានរាយការណ៍ថា ក្មេងស្រីនៅក្នុងប្រទេសអាហ្វហ្គានីស្ថាន គឺជាជនរងគ្រោះចម្បងនៃគោលនយោបាយតាលីបង់។
សារព័ត៌មានតូឡូញូវស៍បានរាយការណ៍ថា កាលពីមុន អ្នករាយការណ៍ពិសេសរបស់អង្គការសហប្រជាជាតិទទួលបន្ទុកប្រទេសអាហ្វហ្គានីស្ថាន លោក រីឆាដ បេនណេត បានអំពាវនាវឱ្យក្រុមតាលីបង់ផ្លាស់ប្តូរគោលនយោបាយ «ឃោរឃៅ និងខុសឆ្គង» ប្រឆាំងនឹងស្ត្រី និងអនុញ្ញាតឱ្យពួកគេចូលធ្វើការ និងដំណើរការអាជីវកម្មវិញ។
ថ្លែងទៅកាន់កិច្ចប្រជុំទៀងទាត់លើកទី៥៤ នៃក្រុមប្រឹក្សាសិទ្ធិមនុស្ស លោក បេនណេត បាននិយាយថា ស្ត្រីចំនួន ៦០.០០០នាក់បានបាត់បង់ការងារដោយសារតែការរឹតត្បិតកាលពីពេលថ្មីៗនេះរបស់រដ្ឋាភិបាលអាហ្វហ្គានីស្ថានបណ្តោះអាសន្ន។
ការអប់រំ និងការងារសម្រាប់កុមារី និងស្ត្រី គឺជាបញ្ហាចម្បងពីរដែលបង្កឱ្យមានប្រតិកម្មនៅកម្រិតអន្តរជាតិ៕
ប្រភព៖ ក្រសួងព័ត៌មាន
