កូរ៉េខាងជើង៖ នៅក្នុងខែនេះ លោកគីម ជុនអ៊ុន គ្រោងនឹងធ្វើដំណើរទស្សនកិច្ចទៅកាន់ប្រទេសរុស្ស៊ី ដើម្បីជួបជាមួយប្រធានាធិបតីលោកពូទីន ដើម្បីពិភាក្សាអំពីលទ្ធភាពផ្គត់ផ្គង់ដល់ទីក្រុងម៉ូស្គូនូវសព្វាវុធសម្រាប់សង្គ្រាមនៅអ៊ុយក្រែន ខណៈដែលរុស្ស៊ីនិយាយថា ខ្លួនកំពុងស្វែងរកការបង្កើនទំនាក់ទំនងយោធាឲ្យកាន់តែជិតស្និទ្ធជាមួយកូរ៉េខាងជើង។
កាលពីថ្ងៃចន្ទ កាសែត New York Times បានរាយការណ៍ដោយដកស្រង់ប្រភពពីសហរដ្ឋអាមេរិក និងសម្ព័ន្ធមិត្តបានឲ្យដឹងថា ក្នុងដំណើរទស្សនកិច្ចដ៏កម្រមួយនៅក្រៅប្រទេស លោកគីម នឹងធ្វើដំណើរចេញពីទីក្រុង Pyongyang ទៅកាន់ទីក្រុង Vladivostok នៅឆ្នេរសមុទ្រប៉ាស៊ីហ្វិកនៃប្រទេសរុស្ស៊ី តាមរថភ្លើងពាសដែក ដែលជាកន្លែងលោកនឹងជួបពិភាក្សាជាមួយលោកពូទីន។
កាសែតបានរាយការណ៍ថា ក្នុងខណៈពេលដែលនៅទីក្រុង Vladivostok ដែលជាទីក្រុងកំពង់ផែនៅមិនឆ្ងាយពីប្រទេសកូរ៉េខាងជើង មេដឹកនាំទាំងពីរនឹងពិភាក្សាអំពីការបញ្ជូនកាំភ្លើងធំ និងកាំជ្រួចមីស៊ីលប្រឆាំងរថក្រោះទៅកាន់រុស្ស៊ី ដើម្បីជាថ្នូរនឹងបច្ចេកវិទ្យាទំនើបផ្កាយរណប និងនាវាមុជទឹកដើរដោយថាមពលនុយក្លេអ៊ែររបស់ទីក្រុងម៉ូស្គូ។
ស្របពេលដែលសហរដ្ឋអាមេរិកបានសម្តែងការព្រួយបារម្ភចំពោះ ការបង្កើនទំនាក់ទំនងយោធារវាងប្រទេសទាំងពីរ ព័ត៌មាននៃដំណើរទស្សនកិច្ចដែលបានគ្រោងទុករបស់លោក Kim បានកើតឡើងបន្ទាប់ពីប្រទេសរុស្ស៊ីបាននិយាយថា ខ្លួនកំពុងពិភាក្សាអំពីការធ្វើសមយុទ្ធយោធារួមគ្នាជាមួយកូរ៉េខាងជើង៕
ប្រភព៖ អគ្គស្នងការដ្ឋាននគរបាលជាតិ
