បរទេស៖ នាយករដ្ឋមន្ត្រីឡាវ លោក សុនិស្ស័យ ស៊ីផាដូន បានបញ្ជាឱ្យអាជ្ញាធរចាត់វិធានការដោះស្រាយជាបន្ទាន់នូវការលំបាកផ្នែកសេដ្ឋកិច្ច និងហិរញ្ញវត្ថុរបស់ប្រទេស ចំពេលដែលមានការបន្តធ្លាក់ចុះនៃប្រាក់គីបឡាវ អតិផរណាដ៏ច្រើន និងបំណុលសាធារណៈខ្ពស់។
កាសែតវៀងច័ន្ទន៍ថែមស៍បានរាយការណ៍កាលពីថ្ងៃទី៣១ ខែសីហាថា នាយករដ្ឋមន្ត្រីឡាវបានចុះហត្ថលេខាលើបទបញ្ជាមួយដែលមានចំនួន ៨ទំព័រកាលពីថ្ងៃទី២៩ ខែសីហា ដែលណែនាំដល់វិស័យពាក់ព័ន្ធនានាឱ្យរក្សាស្ថិរភាពអត្រាប្តូរប្រាក់ រក្សាការឡើងថ្លៃ និងធ្វើការងារបន្ថែមទៀតដើម្បីទូទាត់បំណុលដែលជំពាក់បរទេស។
លោកនាយករដ្ឋមន្ត្រីបានជំរុញឱ្យស្ថាប័នរដ្ឋ និងសង្គមរួមកម្លាំងគ្នាក្នុងសមរភូមិដើម្បីដោះស្រាយបញ្ហាប្រឈមផ្នែកសេដ្ឋកិច្ច និងជំនះពេលវេលាដ៏លំបាកនេះ។
បញ្ហាប្រឈមដ៏ធំបំផុតមួយសម្រាប់ប្រទេសឡាវ គឺការរក្សាស្ថិរភាពតម្លៃនៃប្រាក់គីបឡាវ និងការធានាឱ្យមានការផ្គត់ផ្គង់រូបិយបណ្ណបរទេសគ្រប់គ្រាន់សម្រាប់នាំចូលទំនិញ។
នៅក្រោមបទបញ្ជាថ្មីនេះ ធនាគារនៃប្រទេសឡាវត្រូវបានណែនាំឱ្យធ្វើការដោះស្រាយរាល់សកម្មភាពខុសច្បាប់ដែលទាក់ទងនឹងអត្រាប្តូរប្រាក់។
ធនាគារកណ្តាលមានភារកិច្ចត្រួតពិនិត្យ និងកំណត់ក្រុមគោលដៅដែលអនុវត្តសកម្មភាពប្តូរប្រាក់ ដោយប្រើគណនីផ្ទាល់ខ្លួនរបស់ពួកគេដើម្បីដំណើរការការជួញដូររូបិយប័ណ្ណ។ រដ្ឋាភិបាលបានព្រមានថា ខ្លួននឹងដាក់ពិន័យអ្នកណាដែលធ្វើការប្តូរប្រាក់ ព្រោះតួនាទីនេះត្រូវបានផ្តល់ឱ្យតែធនាគារពាណិជ្ជប៉ុណ្ណោះ។
រដ្ឋាភិបាលឡាវបានបញ្ជាឱ្យភ្នាក់ងាររដ្ឋអនុវត្តវិធានការដែលនឹងនាំមកនូវការប្តូរប្រាក់បរទេសកាន់តែច្រើនទៅកាន់ប្រទេសឡាវ និងរឹតត្បិតទំនិញនាំចូល។
រដ្ឋាភិបាលបានប្រកាសថា ខ្លួននឹងកាត់បន្ថយការចំណាយសាធារណៈទៅលើគម្រោងមិនសំខាន់ និងរឹតបន្តឹងការនាំចូលទំនិញប្រណីត និងផលិតផលដែលឡាវអាចផលិតបាន។
លើសពីនេះទៀត រដ្ឋាភិបាលនឹងបន្តជំរុញការប្រើប្រាស់រថយន្តអគ្គិសនី (EV) ដើម្បីកាត់បន្ថយការនាំចូលប្រេងឥន្ធនៈដែលជាមុខទំនិញសំខាន់មួយ ដែលតម្រូវឱ្យមានការនាំចូលរូបិយប័ណ្ណបរទេសយ៉ាងច្រើន។
គិតត្រឹមខែឧសភាឆ្នាំនេះ រថយន្តដើរដោយថាមពលអគ្គិសនីប្រមាណជិត ៤.០០០គ្រឿងត្រូវបាននាំចូលទៅកាន់ប្រទេសឡាវ ដែលជួយសន្សំសំចៃប្រេងបានរាប់សែនលីត្រដែលនឹងត្រូវនាំចូល។
គោលដៅបន្ទាប់របស់រដ្ឋាភិបាលឡាវ គឺនឹងឱ្យមានរថយន្តអគ្គិសនីចំនួន ៥៥០.០០០គ្រឿងសម្រាប់ប្រើប្រាស់ ដែលស្មើនឹង ៣០% នៃចំនួនរថយន្តទាំងអស់ ហើយនឹងដំឡើងស្ថានីយសាកអាគុយរថយន្តឱ្យបានចំនួន ១០០កន្លែងនៅត្រឹមឆ្នាំ២០៣០៕
ប្រភព៖ ទីភ្នាក់ងារសារព័ត៌មានកម្ពុជា
