បរទេស៖ ប្រទេសកូរ៉េខាងត្បូងកំពុងបង្កើនកិច្ចខិតខំប្រឹងប្រែងការទូតនៅនាទីចុងក្រោយរបស់ទីក្រុងសេអ៊ូលសម្រាប់អាសនៈមិនអចិន្ត្រៃយ៍នៅក្នុងក្រុមប្រឹក្សាសន្តិសុខអង្គការសហប្រជាជាតិ (UNSC) ដោយមានរយៈពេលត្រឹមតែ ១០ថ្ងៃប៉ុណ្ណោះមុនការបោះឆ្នោត។
ប្រទេសកូរ៉េខាងត្បូងដែលមានអាសនៈនៅក្នុងក្រុមប្រឹក្សានេះលើកចុងក្រោយកាលពីក្នុងអាណត្តិឆ្នាំ២០១៣-២០១៤ មានបំណងវិលត្រលប់ទៅកាន់ក្រុមប្រឹក្សានេះវិញសម្រាប់អាណត្តិឆ្នាំ២០២៤-២០២៥ ហើយអង្គការសហប្រជាជាតិនឹងបោះឆ្នោតទៅលើការចូលរួមនេះនៅថ្ងៃទី៦ ខែមិថុនា។
ប្រសិនបើត្រូវបានជាប់ឆ្នោត វានឹងក្លាយជាលើកទីបីហើយសម្រាប់ប្រទេសកូរ៉េខាងត្បូងក្នុងការធ្វើជាសមាជិកមួយក្នុងចំណោមសមាជិកមិនអចិន្ត្រៃយ៍ចំនួន១០ របស់ UNSC ។ កន្លងមក ប្រទេសកូរ៉េខាងត្បូងធ្លាប់កាន់តំណែងនេះកាលពីក្នុងអាណត្តិឆ្នាំ១៩៩៦-១៩៩៧។
ប្រទេសកូរ៉េខាងត្បូងសង្ឃឹមថានឹងវិលត្រលប់ទៅកាន់ក្រុមប្រឹក្សានេះវិញ ខណៈដែលខ្លួនស្វែងរកការពង្រីកតួនាទីរបស់ខ្លួននៅក្នុងសកម្មភាពរបស់អង្គការសហប្រជាជាតិសម្រាប់សន្តិភាព និងសន្តិសុខអន្តរជាតិ ហើយវាក៏នឹងជួយកាត់បន្ថយភាពតានតឹងនៅឧបទ្វីបកូរ៉េផងដែរ៕
ប្រភព៖ ទីភ្នាក់ងារសារព័ត៌មានកម្ពុជា
