បរទេស៖ កាលពីថ្ងៃព្រហស្បតិ៍ ប្រទេសកូរ៉េខាងជើងបានគូសបញ្ជាក់អំពីទំនាក់ទំនងអតីតកាលរបស់ខ្លួនជាមួយបណ្តាប្រទេសនៅទ្វីបអាហ្វ្រិក ហើយបានប្តេជ្ញាពង្រីកទំនាក់ទំនងនៃមិត្តភាព និងកិច្ចសហប្រតិបត្តិការរបស់ពួកគេ។
លោក សុង សេអ៊ីល (Song Se-il) ប្រធានសមាគមកូរ៉េខាងជើង-អាហ្វ្រិក បាននិយាយថា «យើងប្តេជ្ញាគាំទ្រយ៉ាងពេញទំហឹងដល់បណ្តាប្រទេសនៅអាហ្រ្វិកក្នុងកិច្ចខិតខំប្រឹងប្រែងរបស់ពួកគេដើម្បីសម្រេចបាននូវសន្តិភាព ស្ថិរភាព និងបូរណភាពនយោបាយសេដ្ឋកិច្ចនៃទ្វីបនោះ និងកសាងទ្វីបអាហ្រ្វិកប្រកបដោយវិបុលភាព ដោយកិច្ចខិតខំប្រឹងប្រែងរបស់ពួកគេផ្ទាល់ និងដើម្បីជំរុញទំនាក់ទំនងមិត្តភាព និងកិច្ចសហប្រតិបត្តិការរបស់យើងជាមួយបណ្តាប្រទេសក្នុងតំបន់»។
សេចក្តីថ្លែងការណ៍ជាភាសាអង់គ្លេសមួយដែលចេញផ្សាយនៅលើគេហទំព័ររបស់ក្រសួងការបរទេសទីក្រុងព្យុងយ៉ាង បានធ្វើឡើងក្នុងឱកាសខួបលើកទី៦០ នៃទិវាអាហ្វ្រិក ដែលរំលឹកដល់មូលដ្ឋានគ្រឹះនៃអង្គការឯកភាពអាហ្វ្រិក នៅថ្ងៃទី២៥ ខែឧសភា ឆ្នាំ១៩៦៣។
ដោយលើកឡើងពីប្រទេសមួយចំនួនដូចជា ម៉ាដាហ្គាស្ការ អេក្វាទ័រហ្គីណេ អ៊ូហ្គង់ដា និងសៀរ៉ាឡេអូន លោក សុង បានអះអាងថា ទំនាក់ទំនងមិត្តភាពរបស់ទីក្រុងព្យុងយ៉ាងជាមួយទ្វីបនេះ មានតាំងពីជំនាន់អតីតស្ថាបនិកកូរ៉េខាងជើង លោក គីម អ៊ីលស៊ុង មកម៉្លេះ។
អតីតមេដឹកនាំ គីម ដែលបានបង្កើត និងគ្រប់គ្រងប្រទេសកូរ៉េខាងជើងរហូតដល់ឆ្នាំ១៩៩៤ បានចូលរួមយ៉ាងសកម្មនៅក្នុងចលនាមិនចូលបក្សសម្ព័ន្ធប្រឆាំងនឹងចក្រពត្តិនិយមនៅចុងសតវត្សទី២០ ។ នៅពេលនោះ ប្រទេសកូរ៉េខាងជើងបានសកម្មក្នុងការជួយ និងបង្កើតទំនាក់ទំនងជាមិត្តភាពជាមួយនឹងបណ្តាប្រទេសនៅអាហ្វ្រិកដែលជាផ្នែកមួយនៃចលនា។
ប្រទេសកូរ៉េខាងជើងចង់ពង្រឹងទំនាក់ទំនងជាមួយប្រទេសមួយចំនួនក្នុងទ្វីបអាហ្រ្វិក ចំពេលដែលមានទណ្ឌកម្មជាសកលជុំវិញកម្មវិធីនុយក្លេអ៊ែរ និងគ្រាប់មីស៊ីលរបស់ខ្លួន៕
ប្រភព៖ ក្រសួងព័ត៌មាន
