បរទេស៖ ការិយាល័យស្ថិតិជាតិ (ONS) របស់ចក្រភពអង់គ្លេសបាននិយាយកាលពីថ្ងៃពុធថា សន្ទស្សន៍តម្លៃទំនិញប្រើប្រាស់ (CPI) របស់ចក្រភពអង់គ្លេស (UK) បានកើនឡើង ៨,៧% ក្នុងរយៈពេល១២ខែនេះសម្រាប់ខែមេសា ដោយបានធ្លាក់ចុះពី ១០,១% កាលពីក្នុងខែមីនា។
ការិយាល័យ ONS បាននិយាយថា តម្លៃអគ្គិសនី និងឧស្ម័នបានរួមចំណែក ១,៤២% ដល់ការធ្លាក់ចុះនៃអតិផរណាប្រចាំឆ្នាំនៅក្នុងខែមេសានោះ។ នៅក្នុងខែមេសា ឆ្នាំ២០២២ តម្លៃថាមពលរបស់ចក្រភពអង់គ្លេសបានកើនឡើងពាក់កណ្តាលសម្រាប់អតិថិជនប្រហែល ២២លាននាក់ ដោយសារតែការកើនឡើងតម្លៃឧស្ម័នពិភពលោក។
លោក ហ្គ្រែនត៍ ហ្វីតហ្សន័រ (Grant Fitzner) ប្រធានសេដ្ឋវិទូរបស់ការិយាល័យ ONS បាននិយាយថា អត្រាអតិផរណាបានធ្លាក់ចុះគួរឱ្យកត់សម្គាល់ដោយសារតែការកើនឡើងតម្លៃថាមពលដ៏ខ្លាំងដែលបានឃើញកាលពីឆ្នាំមុនមិនត្រូវបានកើតឡើងម្តងទៀតកាលពីក្នុងខែមេសានេះ ប៉ុន្តែត្រូវបានទូទាត់ដោយផ្នែកដោយសារការកើនឡើងនៃតម្លៃរថយន្តជជុះ និងបារី ។
ទោះជាយ៉ាងណាក៏ដោយ តួលេខអតិផរណានៅខែមេសាបានធ្លាក់ចុះតិចជាងការរំពឹងទុក។ វាលើសពីការយល់ស្របនៃ៨,២ភាគរយ និងការព្យាករណ៍៨,៤ភាគរយរបស់ធនាគារអង់គ្លេស នេះបើយោងតាមលោក សាមូអែល តុមបស៍ (Samuel Tombs) ប្រធានសេដ្ឋវិទូចក្រភពអង់គ្លេសនៅទីប្រឹក្សារបស់ Pantheon Macroeconomics ។
តម្លៃអាហារ និងភេសជ្ជៈគ្មានជាតិអាល់កុលគឺខ្ពស់ខ្លាំង ហើយបានកើនឡើង ១៩,១% នៅក្នុងខែមេសា បើធៀបទៅនឹង ១៩,២% នៅក្នុងខែមីនា ដែលជាកម្រិតខ្ពស់បំផុតទីពីរក្នុងរយៈពេលជាង ៤៥ឆ្នាំកន្លងមកនេះ។
CPI ស្នូល ដោយមិនរាប់បញ្ចូលថាមពល អាហារ គ្រឿងស្រវឹង និងថ្នាំជក់ បានកើនឡើង ៦,៨% ក្នុងរយៈពេល១២ខែនេះសម្រាប់ខែមេសា ដោយកើនឡើងពី ៦,២% កាលពីក្នុងខែមីនា ដែលជាអត្រាខ្ពស់បំផុតចាប់តាំងពីខែមីនា ឆ្នាំ១៩៩២ មក៕
ប្រភព៖ ទីភ្នាកង់ារសារព័ត៌មានកម្ពុជា
