បរទេស៖ អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បាននិយាយកាលពីថ្ងៃចន្ទថា ប្រទេសចិនបានជំរុញឱ្យសហរដ្ឋអាមេរិកបង្ហាញភាពស្មោះត្រង់ក្នុងការទំនាក់ទំនងទ្វេភាគី និងចាត់វិធានការជាក់ស្តែងដើម្បីនាំទំនាក់ទំនងចិន និងសហរដ្ឋអាមេរិកត្រឡប់ទៅរកផ្លូវត្រូវវិញ ។
លោកស្រី ម៉ៅ បានធ្វើការកត់សម្គាល់នេះ បន្ទាប់ពីប្រធានាធិបតីសហរដ្ឋអាមេរិក លោក ចូ បៃដិន (Joe Biden) បាននិយាយកាលពីថ្ងៃអាទិត្យថា លោករំពឹងថាទំនាក់ទំនងជាមួយប្រទេសចិននឹងមានភាពប្រសើរឡើង “ក្នុងរយៈពេលដ៏ខ្លី” ដោយបានច្រានចោលការចោទប្រកាន់ “ប៉េងប៉ោងចារកម្ម” ដែលបណ្តាលឱ្យមានជម្លោះការទូតកាលពីដើមឆ្នាំនេះថា “ឆ្កួត” ។
លោក បៃដិន បាននិយាយថា រដ្ឋបាលរបស់លោកកំពុងពិចារណាលើការដកទណ្ឌកម្មលើរដ្ឋមន្ត្រីការពារជាតិលោក លី សាងហ្វូ (Li Shangfu) ដោយដកចេញនូវរបាំងមួយសម្រាប់កិច្ចប្រជុំដ៏មានសក្តានុពលជាមួយរដ្ឋមន្ត្រីការពារជាតិអាមេរិក លោក លូយដ៍ អូស្ទីន (Lloyd Austin) ។
លោកស្រី ម៉ៅ បានប្រាប់សន្និសីទសារព័ត៌មានជាទៀងទាត់ថា ទីក្រុងប៉េកាំង និងទីក្រុងវ៉ាស៊ីនតោនបានរក្សាការទំនាក់ទំនងជាចាំបាច់។ លោកស្រីបាននិយាយបន្ថែមថា ប្រទេសចិនប្រឆាំងយ៉ាងម៉ឺងម៉ាត់ចំពោះទណ្ឌកម្មខុសច្បាប់ និងឯកតោភាគី ហើយបានបង្ហាញពីជំហរដ៏ឧឡារិករបស់ខ្លួនចំពោះភាគីអាមេរិក។
គណៈកម្មាធិការទូទៅ និងសម័យប្រជុំពេញអង្គនៃ WHA លើកទី៧៦ បានសម្រេចបដិសេធនូវអ្វីដែលហៅថាសំណើនៃ “ការអញ្ជើញតៃវ៉ាន់ឱ្យចូលរួមក្នុង WHA ក្នុងនាមជាអ្នកសង្កេតការណ៍” ដែលដាក់ជូនដោយប្រទេសមួយចំនួន។ សន្និបាតប្រចាំឆ្នាំនេះ ចាប់ផ្តើមពីថ្ងៃទី២១ ដល់ថ្ងៃទី៣០ ខែឧសភា។
ក្រសួងបាននិយាយថា ប្រទេសចិនជំរុញឱ្យប្រទេសមួយចំនួនកុំធ្វើពុតជាច្រឡំ ហើយបញ្ឈប់ការអនុវត្តខុសឆ្គងនៃការប្រើប្រាស់តៃវ៉ាន់ដើម្បីទប់ស្កាត់ប្រទេសចិន។
លោក ម៉ា សាវហ្គាង (Ma Xiaoguang) អ្នកនាំពាក្យការិយាល័យកិច្ចការតៃវ៉ាន់នៃក្រុមប្រឹក្សារដ្ឋបានជំរុញឱ្យអាជ្ញាធរ DPP បញ្ឈប់ឧបាយកលនយោបាយលើបញ្ហាទាក់ទងនឹងតៃវ៉ាន់នៅក្នុងអង្គការ WHO ដោយនិយាយថា សកម្មភាពទាំងឡាយណាដែលប្រឈមនឹងគោលការណ៍ចិនតែមួយនឹងត្រូវបរាជ័យ៕
ប្រភព៖ ទីភ្នាក់ងារសារព័ត៌មានកម្ពុជា
