បរទេស៖ អង្គការសុខភាពពិភពលោក (WHO) បាននិយាយនៅក្នុងសេចក្តីថ្លែងការណ៍មួយថា មហាសន្និបាតសុខភាពពិភពលោកលើកទី៧៦ (WHA) បានចាប់ផ្តើមធ្វើឡើងកាលពីថ្ងៃអាទិត្យ ដោយផ្តោតសំខាន់ទៅលើ «ការសង្គ្រោះជីវិត និងការជំរុញសុខភាពសម្រាប់ទាំងអស់គ្នា»។
ខណៈដែលឆ្នាំ២០២៣ គឺជាខួបលើកទី៧៥ នៃអង្គការសុខភាពពិភពលោក ព្រឹត្តិការណ៍ WHA នៅក្នុងឆ្នាំនេះនឹងកំណត់អនាគតភ្លាមៗ និងយូរអង្វែងរបស់អង្គការមួយនេះ ដោយចាប់ផ្តើមពីថវិកាកម្មវិធីសម្រាប់រយៈពេលពីរឆ្នាំខាងមុខ សេចកតីសម្រេចសំខាន់ៗអំពីការផ្តល់ហិរញ្ញប្បទានប្រកបដោយចីរភាព និងការផ្លាស់ប្តូរដើម្បីកែលម្អដំណើរការរបស់អង្គការ WHO និងគណនេយ្យភាព។
អគ្គលេខាធិការអង្គការសហប្រជាជាតិ លោក អាន់តូនីអូ ហ្គូធ័ររែស (Antonio Guterres) បាននិយាយនៅក្នុងសុន្ទរកថាតាមវីដេអូមួយនៅឯពិធីបើកមហាសន្និបាតនោះថា សន្តិភាពអាស្រ័យទៅលើសុខភាព និងជំងឺនៅក្នុងប្រទេសមួយដែលបង្កគ្រោះថ្នាក់ដល់មនុស្សទាំងអស់ ការសម្រេចបាននូវសុខភាពដ៏អស្ចារ្យបំផុតសម្រាប់មនុស្សគ្រប់រូបនៅគ្រប់ទីកន្លែង គឺពឹងផ្អែកទៅលើកិច្ចសហប្រតិបត្តិការ។
លោក ហ្គូធ័ររែស បានកត់សម្គាល់ថា ចាប់តាំងពីកំណើតរបស់អង្គការ WHO កាលពី ៧៥ឆ្នាំមុនមក សុខភាពមនុស្សមានការរីកចម្រើនយ៉ាងខ្លាំង ដោយលោកបាននិយាយបន្ថែមថា អាយុសង្ឃឹមរស់ទូទាំងពិភពលោកកើនឡើងជាង ៥០% ការស្លាប់របស់ទារកមានការធ្លាក់ចុះ ៦០% ហើយជំងឺអុតស្វាយត្រូវបានលុបបំបាត់។
លោក ហ្គូធ័ររែស បាននិយាយថា «ជំងឺរាតត្បាតកូវីដ១៩ បានផ្លាស់ប្តូរវឌ្ឍនភាពនៅក្នុងសុខភាពសាធារណៈ។ យើងប្រថុយនឹងការបំផ្លាញបន្ថែមទៀតនូវការកើនឡើងដ៏ធំដែលបានធ្វើឡើងក្នុងរយៈពេលជាច្រើនទសវត្សរ៍កន្លងមក និងការថយក្រោយទៅលើគោលដៅអភិវឌ្ឍប្រកបដោយចីរភាព»។
ក្នុងពេលថ្លែងសុន្ទរកថាបើកមហាសន្និបាត WHA លោកអគ្គនាយកអង្គការ WHO លោក តេដ្រូស អាដហានុម ហ្គេប្រេយេសូស (Tedros Adhanom Ghebreyesus) បានរំលឹកអំពីសមិទ្ធិផលសំខាន់ៗដែលអង្គការសម្រេចបានក្នុងរយៈពេល ៧៥ឆ្នាំកន្លងមក៕
ប្រភព៖ ទីភ្នាក់ងារសារព័ត៌មានកម្ពុជា
