បរទេស៖ ការនាំចេញអង្កររបស់ប្រទេសថៃបានកើនឡើង ៨,៤៨% ពីមួយឆ្នាំទៅមួយឆ្នាំដែលឈានដល់ចំនួន ២,០៦លានតោននៅក្នុងត្រីមាសទីមួយនៃឆ្នាំនេះ។
យោងតាមអ្នកនាំពាក្យរដ្ឋាភិបាលថៃ លោក អានុចា ប៊ូរ៉ាប៉ាចៃស្រ៊ី (Anucha Burapachaisri) បានឱ្យដឹងថា ក្នុងរយៈពេលបីខែដំបូងនៃឆ្នាំ២០២៣ ការនាំចេញអង្កររបស់ប្រទេសនេះមានតម្លៃ ៣៨,០៦ប៊ីលានបាត (១,១ប៊ីលានដុល្លារអាម៉េរិក) ដោយកើនឡើងបាន ២៩,២៦%។ ក្នុងចំណោមការនាំចេញសរុបនោះ មានការនាំចេញ ១៦,៣៨% ត្រូវបានទិញដោយប្រទេសអ៊ីរ៉ាក់ បន្ទាប់មកគឺប្រទេសឥណ្ឌូណេស៊ី (១៣,០៨%) សហរដ្ឋអាមេរិក (៨,៦២%) អាហ្រ្វិកខាងត្បូង (៨,២៤%) និងសេណេហ្គាល់ (៥,៨៦%)។
លោក អានុចា បាននិយាយថា នាយកដ្ឋានពាណិជ្ជកម្មបរទេសនៃក្រសួងពាណិជ្ជកម្មថៃបានរៀបចំសន្និសីទស្តីពី «សន្និបាតអង្ករថៃឆ្នាំ២០២៣» នៅខេត្តឈៀងរ៉ៃ កាលពីថ្ងៃទី២៤-២៥ ខែមេសាកន្លងទៅ។
លោកបាននិយាយថា ព្រឹត្តិការណ៍នេះមានគោលបំណងបង្កើតការយល់ដឹងក្នុងចំណោមកសិករអំពីរបៀបដាំដុះពូជស្រូវផ្សេងៗគ្នា និងពិនិត្យស្តង់ដារមុនពេលនាំចេញ ក៏ដូចជាស្ថានភាពទីផ្សារពិភពលោក។
លោកបាននិយាយបន្តថា វាក៏ស្របទៅតាមយុទ្ធសាស្ត្រអង្ករថៃ (ឆ្នាំ២០២០-២០២៤) ដែលមានគោលបំណងធ្វើឱ្យប្រទេសថៃក្លាយជាប្រទេសឈានមុខគេលើពិភពលោកក្នុងការផលិត និងទីផ្សារអង្ករ។
លោកបាននិយាយបន្ថែមថា ក្រសួងពាណិជ្ជកម្មកំពុងកំណត់គោលដៅនាំចេញអង្ករថៃពីចំនួន ៧,៥លានតោនទៅ ៨លានតោននៅក្នុងឆ្នាំនេះ៕
ប្រភព៖ ទីភ្នាក់ងារសារព័ត៌មានកម្ពុជា
