បរទេស៖ រដ្ឋមន្ត្រីការបរទេសគុយបា លោក ប្រ៊ូណូ រ៉ូឌ្រីហ្គេហ្ស (Bruno Rodríguez) បាននិយាយថា ប្រទេសគុយបាកោតសរសើរចំពោះការគាំទ្រដែលមិនអាចផ្លាស់ប្តូរបានរបស់អាស៊ានសម្រាប់ការតស៊ូរបស់ប្រជាជនគុយបាប្រឆាំងនឹងការបិទផ្លូវ ហើយបញ្ជាក់សារជាថ្មីនូវឆន្ទៈក្នុងការបន្តពង្រឹងទំនាក់ទំនងជាមួយអាស៊ានក្នុងវិស័យមួយចំនួន។
លោកបានថ្លែងបែបនេះក្នុងពេលជួបប្រជុំជាមួយឯកអគ្គរដ្ឋទូតនៃប្រទេសជាសមាជិកអាស៊ាននៅទីក្រុងហាវ៉ាណា កាលពីថ្ងៃទី១៤ ខែមេសា។
នៅក្នុងកិច្ចប្រជុំនោះ គណៈប្រតិភូបានពិភាក្សាអំពីការចូលរួមរបស់ប្រទេសគុយបានៅក្នុងសន្ធិសញ្ញាមិត្តភាព និងកិច្ចសហប្រតិបត្តិការនៅតំបន់អាស៊ីអាគ្នេយ៍ (TAC) ឆ្នាំ២០២០ ក៏ដូចជាសក្តានុពលក្នុងការពង្រីកកិច្ចសហប្រតិបត្តិការលើវិស័យមួយចំនួនដែលមានកង្វល់រួម។
មន្ត្រីការទូតនៃបណ្តាប្រទេសអាស៊ាន ដែលរួមមានប្រទេសកម្ពុជា វៀតណាម ឥណ្ឌូណេស៊ី ឡាវ ម៉ាឡេស៊ី និងមីយ៉ាន់ម៉ា បានវាយតម្លៃខ្ពស់ចំពោះកិច្ចសហប្រតិបត្តិការ និងការគាំទ្រគ្នាទៅវិញទៅមកនៅវេទិកាអន្តរជាតិ ព្រមទាំងបានបញ្ជាក់ពីការគាំទ្រចំពោះពហុភាគីនិយម និងការការពារគោលការណ៍ច្បាប់អន្តរជាតិ និងតួនាទីរបស់អង្គការសហប្រជាជាតិ៕
ប្រភព៖ ក្រសួងព័ត៌មាន
