បរទេស៖ ទីប្រឹក្សារដ្ឋ និងជារដ្ឋមន្ត្រីការបរទេសចិន លោក គីន ហ្កាង (Qin Gang) បានជួបប្រជុំជាមួយគណៈប្រតិភូសហរដ្ឋអាមេរិកនៅទីក្រុងប៉េកាំង កាលពីថ្ងៃសៅរ៍ ដែលមានអ្នកតំណាងមកពីក្រុមមិត្តភាព និងរង្វង់ធុរកិច្ច ។
ដោយការស្វាគមន៍ចំពោះគណៈប្រតិភូនោះ លោក គីន បាននិយាយថា អាកប្បកិរិយារបស់ប្រទេសចិនចំពោះការអភិវឌ្ឍប្រកបដោយស្ថិរភាព និងស្ថាបនានៃទំនាក់ទំនងរវាងចិន-សហរដ្ឋអាមេរិកនៅតែមិនមានការផ្លាស់ប្តូរ។
លោកបាននិយាយថា ប្រទេសចិនតែងតែជឿជាក់ថាប្រទេសទាំងពីរគួរតែគោរពគ្នាទៅវិញទៅមក រួមរស់ដោយសន្តិភាព និងសហការគ្នាដើម្បីលទ្ធផលឈ្នះ-ឈ្នះ។
ដោយបានកត់សម្គាល់ថា ទំនាក់ទំនងទ្វេភាគីល្អគឺទាមទារនូវកិច្ចខិតខំប្រឹងប្រែងពីភាគីទាំងពីរនោះ លោក គីន បានជំរុញឱ្យភាគីសហរដ្ឋអាមេរិកបោះបង់ចោលនូវចិត្តគំនិតផលបូកសូន្យរបស់ខ្លួន បញ្ឈប់ការទប់ស្កាត់ និងការគាបសង្កត់ប្រទេសចិនតាមរយៈមធ្យោបាយអយុត្តិធម៌ ហើយធ្វើការងារជាមួយប្រទេសចិនដើម្បីនាំទំនាក់ទំនងទ្វេភាគីត្រឡប់ទៅរកផ្លូវមួយដែលមានភាពល្អប្រសើរ និងមានការអភិវឌ្ឍប្រកបដោយស្ថិរភាពឡើងវិញ។
លោក គីន បាននិយាយថា ធុរកិច្ចសហរដ្ឋអាមេរិកស្វាគមន៍ក្នុងការពង្រីកការវិនិយោគរបស់ពួកគេនៅក្នុងប្រទេសចិន ហើយប្រទេសចិននឹងបន្តកែលម្អបរិយាកាសអាជីវកម្មសម្រាប់ក្រុមហ៊ុនបរទេស។
សមាជិកនៃគណៈប្រតិភូសហរដ្ឋអាមេរិកបាននិយាយថា ក្នុងដំណើរបំពេញទស្សនកិច្ចនេះ ពួកគេមានសុទិដ្ឋិនិយមចំពោះភាពរឹងមាំនៃការអភិវឌ្ឍសេដ្ឋកិច្ច និងសង្គមរបស់ប្រទេសចិន និងការរំពឹងទុករបស់ប្រជាជនចិនសម្រាប់ការអភិវឌ្ឍទំនាក់ទំនងទ្វេភាគី៕
ប្រភព៖ ក្រសួងព័ត៌មាន
