បរទេស៖ ទីប្រឹក្សារដ្ឋ និងជារដ្ឋមន្ត្រីការបរទេសចិន លោក វ៉ាង យី បានជួបជាមួយឯកអគ្គរដ្ឋទូតរុស្ស៊ីថ្មីប្រចាំនៅប្រទេសចិន លោក អ៊ីហ្គោរ ម៉ូរហ្គូឡូវ កាលពីថ្ងៃអាទិត្យ។
លោក វ៉ាង ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន បានស្វាគមន៍ឯកអគ្គរដ្ឋទូតរុស្ស៊ីដើម្បីចូលកាន់តំណែងថ្មីរបស់លោកនៅក្នុងប្រទេសចិន ដោយលោកបាននិយាយបន្ថែមថា ទាំងប្រទេសចិន និងរុស្ស៊ី បានប្តេជ្ញាចិត្តក្នុងការលើកកម្ពស់ពហុប៉ូលរបស់ពិភពលោក។
លោក វ៉ាង បាននិយាយថា ប្រទេសទាំងពីរប្តេជ្ញារក្សាប្រព័ន្ធអន្តរជាតិជាមួយអង្គការសហប្រជាជាតិជាស្នូល និងសណ្តាប់ធ្នាប់អន្តរជាតិដោយផ្អែកលើច្បាប់អន្តរជាតិ ហើយបដិសេធនយោបាយអំណាច។
លោកបាននិយាយថា មិនថាស្ថានភាពអន្តរជាតិអាចវិវឌ្ឍទៅជាយ៉ាងណានោះទេ ប្រទេសចិន និងរុស្ស៊ីនឹងជំរុញការជឿទុកចិត្តគ្នាទៅវិញទៅមកជាយុទ្ធសាស្រ្ត និងកិច្ចសហប្រតិបត្តិការជាក់ស្តែង ហើយរួមគ្នាលើកកម្ពស់ភាពត្រឹមត្រូវ និងយុត្តិធម៌អន្តរជាតិ។
លោក ម៉ូរហ្គូឡូវ បាននិយាយថា ទំនាក់ទំនងរវាងរុស្ស៊ី-ចិន គឺមិនអាចបំបែកបាន ហើយមិត្តភាពរវាងប្រទេសទាំងពីរអាចយកឈ្នះទៅលើបញ្ហាប្រឈមណាមួយ។
ភាគីទាំងពីរក៏បានផ្លាស់ប្តូរទស្សនៈគ្នាទៅលើបញ្ហាអន្តរជាតិ និងតំបន់ដែលជាកង្វល់រួមផងដែរ៕
ប្រភព៖ ក្រសួងព័ត៌មាន
