បរទេស៖ ក្រសួងធនធានមនុស្សរបស់ប្រទេសម៉ាឡេស៊ីបានប្រកាសថា ខ្លួនបានអនុម័តកូតាសម្រាប់ការជ្រើសរើសពលករបរទេសចំនួន ៥៤១ ៣១៥នាក់ គិតត្រឹមថ្ងៃទី១ ខែកញ្ញា។ ដោយគិតពីចំនួនពលករបរទេសចំនួន ១,៣លាននាក់នៅក្នុងប្រទេសម៉ាឡេស៊ី និងកូតាដែលត្រូវបានអនុម័តនេះ ក្រសួងធនធានមនុស្សបានគូសបញ្ជាក់ថា តួលេខទាំងនេះស្ទើរតែបំពេញចំពោះតម្រូវការពលករបរទេសរបស់ប្រទេសនេះ។
ទិន្នន័យរបស់ក្រសួងធនធានមនុស្សបានបង្ហាញថា ចំនួនពលករបរទេសដែលធ្វើការច្រើនជាងគេបំផុតមិនធ្លាប់មាននៅក្នុងប្រទេសនៅតំបន់អាស៊ីអាគ្នេយ៍មួយនេះ ដែលមានចំនួន ១,៨លាននាក់។
ចាប់តាំងពីការផ្ទុះឡើងនៃជំងឺរាតត្បាតកូវីដ-១៩ វិស័យសេដ្ឋកិច្ចជាច្រើននៃប្រទេសម៉ាឡេស៊ីបានប្រឈមមុខនឹងការខ្វះខាតកម្លាំងពលកម្មយ៉ាងខ្លាំង ជាពិសេសវិស័យឧស្សាហកម្មប្រេងដូង និងសំណង់។ ជាមួយនឹងភាពងាយស្រួលនៃបទប្បញ្ញត្តិចត្តាឡីស័ក និងការបើកព្រំដែនឡើងវិញចាប់ពីថ្ងៃទី១ ខែមេសាមក សេដ្ឋកិច្ចរបស់ប្រទេសម៉ាឡេស៊ីបានងើបឡើងវិញជាវិជ្ជមាន ប៉ុន្តែតម្រូវការសម្រាប់ពលករបរទេសក៏កើនឡើងផងដែរ។
ដើម្បីទាក់ទាញពលករបរទេសកាន់តែច្រើន រដ្ឋាភិបាលម៉ាឡេស៊ីបានបន្ធូរបន្ថយបទប្បញ្ញត្តិស្តីពីការចូល និងការជ្រើសរើសបុគ្គលិក ព្រមទាំងបានដំឡើងប្រាក់ឈ្នួលដល់ពលកររហូតដល់ ១ ៥០០រីងហ្គីត (៣២៣ដុល្លារអាម៉េរិក) ក្នុងមួយខែ៕
ប្រភព៖ ក្រសួងព័ត៌មាន
