បរទេស៖ រដ្ឋាភិបាលថៃនឹងពន្យារពេលនៃការដំឡើងពន្ធគយលើប្រេងឥន្ធនៈដែលបានគ្រោងធ្វើឡើងនៅក្នុងខែសីហានេះ ខណៈដែលមន្ត្រីរដ្ឋាភិបាលស្វែងរកមធ្យោបាយបន្ថែមទៀតដើម្បីសម្រាលបន្ទុកហិរញ្ញវត្ថុរបស់អ្នកប្រើប្រាស់។
យោងតាមអ្នកនាំពាក្យរដ្ឋាភិបាលថៃ លោក ថាណាកន វ៉ាងប៊ុនគង់ចាណា បានឱ្យដឹងថា នាយករដ្ឋមន្ត្រីថៃ លោកឧត្តមសេនីយ៍ ប្រាយុធ ចានអូចា កាលពីពេលថ្មីៗនេះបានពិភាក្សាអំពីការដំឡើងពន្ធគយលើប្រេងឥន្ធនៈជាមួយក្រសួងថាមពល និងគណៈកម្មការត្រួតពិនិត្យវិស័យថាមពល។ ភាគីទាំងអស់បានព្រមព្រៀងគ្នាថា ការដំឡើងពន្ធគយលើប្រេងឥន្ធនៈថ្មីនេះនឹងចូលជាធរមានក្នុងខែកញ្ញា និងបន្តរហូតដល់ខែធ្នូ ដោយស្ថាប័នពាក់ព័ន្ធទាំងអស់បានណែនាំឱ្យស្វែងរកវិធីឧបត្ថម្ភធនទៅលើថ្លៃអគ្គីសនីតាមតែអាចធ្វើទៅបាន ជាពិសេសសម្រាប់ក្រុមគ្រួសារ និងប្រជាជនដែលងាយរងគ្រោះ។
អ្នកនាំពាក្យរូបនេះក៏បានបង្ហាញផងដែរអំពីការព្រួយបារម្ភរបស់លោកនាយករដ្ឋមន្ត្រីអំពីផលប៉ះពាល់នៃការដំឡើងពន្ធគយនេះ ដោយលោកបាននិយាយបន្ថែមថា រដ្ឋាភិបាលកំពុងធ្វើការងារដើម្បីកាត់បន្ថយផលប៉ះពាល់ដែលបានរំពឹងទុក ប្រសិនបើការដំឡើងនេះមិនអាចជៀសបាននោះ។ តម្លៃថាមពលបានកើនឡើងជាបន្តបន្ទាប់ដែលជាលទ្ធផលនៃការដាក់ទណ្ឌកម្មទៅលើប្រទេសរុស្ស៊ី បន្ទាប់ពីការផ្ទុះឡើងនៃជម្លោះរវាងអ៊ុយក្រែន និងរុស្ស៊ី ដោយបង្ខំឱ្យអាជ្ញាធរធ្វើផែនការកែសម្រួលតម្លៃប្រេងឥន្ធនៈដើម្បីរក្សាតម្លៃដែលកំពុងកើនឡើង៕
ប្រភព៖ ក្រសួងព័ត៌មាន
