បរទេស៖ រដ្ឋាភិបាលថៃគ្រោងនឹងបង្កើនចំនួនស្ថានីយសាកអាគុយសម្រាប់រថយន្តអគ្គិសនី (EV) ឱ្យបានជាង ៦៥ភាគរយនៅត្រឹមឆ្នាំ២០៣០។
យោងតាមអ្នកនាំពាក្យរងរដ្ឋាភិបាលថៃ លោកស្រី រ៉ាចាដា ថ្នាឌីរេក បានឱ្យដឹងថា ចំនួនស្ថានីយ៍សាកអាគុយសម្រាប់រថយន្ត EV នៅទូទាំងប្រទេសថៃនឹងកើនឡើងពីចំនួន ៩៤៤កន្លែងដល់ ១ ៣៩៤កន្លែងក្នុងរយៈពេលប្រាំបួនឆ្នាំខាងមុខ។ ដំណោះស្រាយនេះបានធ្វើឡើងតាមការសិក្សាដែលត្រូវបានធ្វើឡើងដោយក្រសួងថាមពល ដើម្បីជំរុញការផលិតរថយន្ត EV នៅក្នុងប្រទេសថៃ។
អ្នកនាំពាក្យរូបនេះបាននិយាយបន្ថែមថា អាជ្ញាធរអគ្គិសនីថៃ (EGAT) និងទីភ្នាក់ងារអភិវឌ្ឍវិទ្យាសាស្ត្រ និងបច្ចេកវិទ្យាជាតិ (NSTDA) បានបង្កើតមជ្ឈមណ្ឌលសាកល្បង និងវិញ្ញាបនកម្មសម្រាប់ឧបករណ៍សាកដែលមានកម្រិតវ៉ុលខ្ពស់សម្រាប់រថយន្ត EV និងឧបករណ៍ផ្សេងៗទៀត។
មជ្ឈមណ្ឌលនេះបានបើកកាលពីថ្ងៃទី១៥ ខែកក្កដា ដោយអនុញ្ញាតឱ្យក្រុមហ៊ុនផលិតក្នុងស្រុកកាត់បន្ថយការចំណាយ និងពន្លឿនការអភិវឌ្ឍរថយន្ត EV ដោយលុបបំបាត់តម្រូវការក្នុងការបញ្ជូនផលិតផលរបស់ពួកគេទៅទទួលការបញ្ជាក់នៅក្នុងប្រទេសផ្សេងទៀត។ កិច្ចការនេះនឹងជួយដល់ឧស្សាហកម្មរថយន្ត EV ក្នុងស្រុក និងគាំទ្រដល់គោលដៅរបស់រដ្ឋាភិបាលក្នុងការក្លាយជាប្រទេសឈានមុខគេទាក់ទងនឹងវិស័យយានយន្តអគ្គិសនី៕
ប្រភព៖ ក្រសួងព័ត៌មាន
