បរទេស៖ សារព័ត៌មានរ៉យទ័របាននិយាយកាលពីថ្ងៃអាទិត្យដោយដកស្រង់សម្តីរបស់មន្ត្រីប៉ាឡេស្ទីនម្នាក់ថា បទឈប់បាញ់នៅតំបន់ហ្គាហ្សាស្ទ្រីបនឹងចូលជាធរមានចាប់ពីម៉ោង២០:០០ ម៉ោងក្នុងស្រុក នៅថ្ងៃអាទិត្យទី៧ ខែសីហា។
មន្ត្រីនោះបាននិយាយនៅពេលមុននេះថា អ៊ីស្រាអែលបានទទួលយកសំណើមួយស្តីពីការបង្កើតបទឈប់បាញ់មួយដែលស្នើឡើងដោយអេហ្ស៊ីប ដែលកំពុងដើរតួនាទីជាអ្នកសម្រុះសម្រួល។
ទូរទស្សន៍ Al-Hadath បាននិយាយនៅពេលមុននេះបន្តិចថា អេហ្ស៊ីបកំពុងពិភាក្សាជាមួយភាគីអ៊ីស្រាអែល និងប៉ាឡេស្ទីន ស្តីពីបទឈប់បាញ់នៅតំបន់ហ្គាហ្សាស្ទ្រីប។
យោងតាមទូរទស្សន៍ Al-Jazeera បានឱ្យដឹងថា អេហ្ស៊ីបត្រូវបានគេរំពឹងថានឹងប្រកាសនូវការអំពាវនាវរបស់ខ្លួនឱ្យមានបទឈប់បាញ់នៅវេលាម៉ោង១៧:០០ ម៉ោងក្នុងស្រុក។ ទូរទស្សន៍នេះក៏បាននិយាយផងដែរដោយលើកឡើងពីប្រភពរបស់ខ្លួនថា កិច្ចព្រមព្រៀងឈប់បាញ់នេះក៏នឹងផ្តល់នូវការបន្ធូរបន្ថយចំពោះការបិទផ្លូវសេដ្ឋកិច្ចនៃតំបន់ហ្កាហ្សាស្ទ្រីបដែរ។
ចលនាប៉ាឡេស្ទីនរ៉ាឌីកាល់ហាម៉ាស់បាននិយាយកាលពីថ្ងៃអាទិត្យថា ខ្លួនគាំទ្រទាំងស្រុងចំពោះបទឈប់បាញ់នេះ ហើយបាននិយាយអំពីបញ្ហានេះជាមួយបណ្តាមេដឹកនាំស៊ីវិលជីហាដអ៊ីស្លាម។
កាលពីថ្ងៃសុក្រ កងកម្លាំងការពារអ៊ីស្រាអែល (IDF) បានបើកប្រតិបត្តិការ Dawn ប្រឆាំងនឹងក្រុមអ៊ីស្លាមជីហាដប៉ាឡេស្ទីននៅតំបន់ហ្គាហ្សាស្ទ្រីប។ យោងតាមប្រភពវេជ្ជសាស្ត្របានឱ្យដឹងថា មនុស្ស ៣២នាក់ត្រូវបានសម្លាប់ និង ២៥៣នាក់បានរងរបួស ដែលជាលទ្ធផលនៃការវាយប្រហាររបស់អ៊ីស្រាអែល។ ជាការឆ្លើយតប ពួករ៉ាឌីកាល់បានបាញ់គ្រាប់មីស៊ីល និងរ៉ុក្កែតជាង ៧០០គ្រាប់ទៅលើទឹកដីអ៊ីស្រាអែល៕
ប្រភព៖ ក្រសួងព័ត៌មាន
