បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថាកាលពីថ្ងៃព្រហស្បតិ៍ រដ្ឋមន្ត្រីការបរទេសអង់គ្លេស លោកស្រី លីហ្ស៍ ទ្រូសស៍ បានចេញមុខប្រឆាំងនឹងការចូលរួមដោយផ្ទាល់របស់កងទាហានអង់គ្លេសនៅក្នុងជម្លោះអ៊ុយក្រែន។
អ្នកនយោបាយដែលបានឈានដល់ជុំចុងក្រោយនៃការប្រណាំងសម្រាប់សម្រាប់តំណែងមេដឹកនាំគណបក្សអភិរក្សនិយម និងជានាយករដ្ឋមន្ត្រីអង់គ្លេសរូបនេះបានប្រាប់សារព័ត៌មាន BBC ថា «យើងកំពុងធ្វើឱ្យអស់ពីសមត្ថភាពដើម្បីគាំទ្រអ៊ុយក្រែន។ យើងបានដឹកនាំក្រុមចម្រុះអន្តរជាតិទៅលើការបញ្ជូនអាវុធ ហើយយើងកំពុងដាក់ទណ្ឌកម្ម ប៉ុន្តែខ្ញុំមិនគាំទ្រចំពោះការចូលរួមដោយផ្ទាល់របស់កងទាហានអង់គ្លេសទេ»។
លោកស្រី លីហ្ស៍ ទ្រូសស៍ នឹងត្រូវជួបជាមួយអតីតអធិការបតីនៃចក្រភពអង់គ្លេស លោក រីស៊ី ស៊ូណាក់ ក្នុងជុំចុងក្រោយនៃការប្រណាំងប្រជែងដើម្បីស្នងតំណែងលោកនាយករដ្ឋមន្ត្រី បូរីស ចនសុន។ ឥឡូវនេះសមាជិកប្រមាណជិត ២០០ ០០០នាក់នៃគណបក្សអភិរក្សនិយមនឹងត្រូវសម្រេចចិត្តនៅដើមខែកញ្ញាទៅលើជោគវាសនារបស់បេក្ខភាពទាំងពីរ។មេដឹកនាំថ្មីនៃគណបក្សដែលនឹងក្លាយជានាយករដ្ឋមន្ត្រីដោយស្វ័យប្រវត្តិនឹងត្រូវបានបង្ហាញនៅថ្ងៃទី៥ ខែកញ្ញា។
កាលពីថ្ងៃទី២៤ ខែកុម្ភៈ ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅក្នុងសុន្ទរកថាមួយតាមទូរទស្សន៍ថា ជាការឆ្លើយតបទៅនឹងសំណើរបស់ប្រមុខនៃសាធារណរដ្ឋប្រជាមានិតដុនបាសស៍ លោកបានធ្វើការសម្រេចចិត្តដើម្បីធ្វើប្រតិបត្តិការយោធាពិសេសមួយដើម្បីការពារប្រជាជនដែលទទួលរងការរំលោភបំពាន និងការប្រល័យពូជសាសន៍ដោយរបបទីក្រុងគៀវអស់រយៈពេលប្រាំបីឆ្នាំ។ ក្រោយពីបញ្ហានេះកើតឡើង សហរដ្ឋអាមេរិក និងសម្ព័ន្ធមិត្តបានប្រកាសដាក់ទណ្ឌកម្មទៅលើរុស្ស៊ី និងបង្កើនការបញ្ជូនសព្វាវុធទៅទីក្រុងគៀវ៕
ប្រភព៖ ក្រសួងព័ត៌មាន
