បរទេស៖ នេះបើយោងតាមការចេញផ្សាយរបស់សារព័ត៌មាន TASS បានអោយដឹងថាកាលពីថ្ងៃព្រហស្បតិ៍ អនុប្រធានក្រុមប្រឹក្សាសន្តិសុខរុស្ស៊ី លោក ឌ្មីទ្រី មេដវីដេវ បានសរសេរនៅលើបណ្តាញតេឡេក្រាមរបស់លោកថា អ៊ុយក្រែនជារដ្ឋមួយដែលអាចនឹងបាត់ខ្លួនពីផែនទីពិភពលោក ដែលជាលទ្ធផលមួយនៃព្រឹត្តិការណ៍នាពេលបច្ចុប្បន្ន។
លោកបានកត់សម្គាល់ថា «បន្ទាប់ពីរដ្ឋប្រហារឆ្នាំ២០១៤ ប្រទេសអ៊ុយក្រែនបានបាត់បង់ឯករាជ្យភាពរដ្ឋរបស់ខ្លួនហើយបានធ្លាក់នៅក្រោមការគ្រប់គ្រងដោយផ្ទាល់នៃសមូហភាពលោកខាងលិច ក៏ដូចជាបានចាប់ផ្តើមជឿថា អង្គការណាតូនឹងធានាដល់សន្តិសុខរបស់ខ្លួន»។ អ្នកនយោបាយរូបនេះបាននិយាយបន្ថែមថា «ជាលទ្ធផលនៃព្រឹត្តិការណ៍ទាំងអស់នាពេលបច្ចុប្បន្ននេះ អ៊ុយក្រែនអាចនឹងបាត់បង់នូវអ្វីដែលនៅសេសសល់នៃអធិបតេយ្យភាពរដ្ឋរបស់ខ្លួន និងបាត់ពីផែនទីពិភពលោក»។
លោក មេដវីដេវ ក៏បានអះអាងផងដែរថា «ឧក្រិដ្ឋជនអ៊ុយក្រែននឹងត្រូវកាត់ទោសចំពោះអំពើឃោរឃៅដែលបានប្រព្រឹត្តទៅលើប្រជាជនអ៊ុយក្រែន និងរុស្ស៊ី»៕
ប្រភព៖ ក្រសួងព័ត៌មាន
