បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៣ ខែមេសា ឆ្នាំ២០២២ បានអោយដឹងថា ទីក្រុងមូស្គូបាននិយាយកាលពីថ្ងៃសៅរ៍ថា កងកម្លាំងរុស្ស៊ីបានបំផ្លាញស្ថានីយដឹកជញ្ជូននៅ Odessa ដែលផ្ទុកអាវុធបរទេសដ៏ធំមួយ ចំពេលមានការវាយលុកយោធាដែលកំពុងបន្តនៅក្នុងប្រទេសអ៊ុយក្រែន។ ទោះបីជាយ៉ាងណាក៏ដោយ អាជ្ញាធរទីក្រុងខាងលើបានអះអាងថា ក្រុមការពារដែនអាកាសរបស់ខ្លួនបានបំផ្លាញមីស៊ីលចំនួន ២គ្រាប់ ប៉ុន្តែ ៤គ្រាប់ផ្សេងទៀតបានវាយប្រហារគោលដៅយោធា និងអគារលំនៅដ្ឋាន ដែលនាំឱ្យមានជនរងគ្រោះ។
យោងតាមអ្នកនាំពាក្យយោធារុស្ស៊ី ឧត្តមសេនីយឯក Igor Konashenkov នៅពេលរសៀល “កាំជ្រួចមីស៊ីលរយៈចម្ងាយឆ្ងាយដែលមានភាពជាក់លាក់ខ្ពស់” បានវាយប្រហារស្ថានីយដឹកជញ្ជូនដែលមានទីតាំងនៅលើអាកាសយានដ្ឋានយោធាក្បែរទីក្រុង Odessa ជាកន្លែងដែល “អាវុធបរទេសដ៏ធំមួយបានទទួលពីសហរដ្ឋអាមេរិក និងប្រទេសអឺរ៉ុបត្រូវបានរក្សាទុក”៕
