បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១៨ ខែមេសា ឆ្នាំ២០២២ បានអោយដឹងថាយោងតាមក្រសួងការពារជាតិ នៅក្នុងទីក្រុងអង់ការ៉ា បានឱ្យដឹងថា ប្រទេសទួរគីបានចាប់ផ្តើមការវាយលុកយោធាឆ្លងព្រំដែនដ៏ធំមួយ ដោយផ្តោតលើក្រុមសកម្មប្រយុទ្ធ Kurdistan Workers’ Party (PKK) នៅភាគខាងជើងនៃប្រទេសអ៊ីរ៉ាក់។
រដ្ឋមន្ត្រីក្រសួងការពារជាតិ Hulusi Akar បានប្រកាសនៅក្នុងសុន្ទរកថាតាមវីដេអូមួយកាលពីព្រឹកថ្ងៃចន្ទថា ប្រតិបត្តិការនេះពាក់ព័ន្ធនឹងយុទ្ធនាការវាយប្រហារតាមអាកាសយ៉ាងធំនេះដោយប្រើយន្តហោះ ឧទ្ធម្ភាគចក្រ និងយន្តហោះគ្មានមនុស្សបើក ក៏ដូចជាការលុកលុយផ្លូវគោកដោយកងទ័ព commando ។
ទីក្រុងអង់ការ៉ាបានអះអាងថា ខ្លួនបានបំផ្លាញដោយជោគជ័យនូវលេណដ្ឋាន ផ្លូវរូងក្រោមដី និងឃ្លាំងរំសេវជាច្រើន ក៏ដូចជាទីបញ្ជាការយោធានៃ PKK នៅតំបន់ព្រំដែនភាគខាងជើងនៃប្រទេសអ៊ីរ៉ាក់ ដូចជា Metina, Zap និង Avashin-Basyan មុនពេលកងកម្លាំងជើងគោកចាប់ផ្តើមចូលទៅក្នុងរដ្ឋជិតខាង។ គេមិនដឹងថាមានទាហាន និងសព្វាវុធអ្វីខ្លះ ចំនួនប៉ុន្មានដែលត្រូវប្រើប្រាស់ក្នុងប្រតិបត្តិការនេះ៕
