បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១៦ ខែមេសា ឆ្នាំ២០២២ បានអោយដឹងថាក្រសួងការពារជាតិរុស្ស៊ីបានអំពាវនាវឱ្យកងកម្លាំងអ៊ុយក្រែនដែលនៅសេសសល់ ដែលត្រូវឡោមព័ទ្ធនៅរោងចក្រដែកក្នុងទីក្រុងឆ្នេរសមុទ្រ Mariupol ឱ្យដាក់អាវុធរបស់ពួកគេចុះ ដោយផ្តល់ការធានាអាយុជីវិត និងសុវត្ថិភាព ប្រសិនបើពួកគេទទួលយកសំណើ និងបញ្ឈប់រាល់អរិភាពចាប់ពីព្រឹកថ្ងៃអាទិត្យ។
ក្រសួងការពារជាតិរុស្ស៊ីបាននិយាយនៅក្នុងសេចក្តីប្រកាសកាលពីយប់ថ្ងៃសៅរ៍ បានបញ្ជាក់ថា “ដោយពិចារណាលើស្ថានភាពមហន្តរាយនៅរោងចក្រលោហៈ Azovstal និងត្រូវបានដឹកនាំដោយគោលការណ៍មនុស្សធម៌សុទ្ធសាធ។ កងកម្លាំងប្រដាប់អាវុធរុស្ស៊ីបានផ្តល់ជូនក្រុមសកម្មប្រយុទ្ធនៃកងវរសេនាតូចជាតិនិយម និងទាហានស៊ីឈ្នួលបរទេសដើម្បីបញ្ឈប់អរិភាព ហើយដាក់អាវុធរបស់ពួកគេចាប់ផ្តើមពីម៉ោង ៦ព្រឹក ម៉ោងនៅទីក្រុងម៉ូស្គូ ថ្ងៃទី១៧ ខែមេសា ឆ្នាំ២០២២”។
ក្រសួងបានបញ្ជាក់ថា “អ្នកទាំងអស់ដែលដាក់អាវុធត្រូវបានធានានូវការរក្សាអាយុជីវិត”៕
