បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី៣០ ខែមីនា ឆ្នាំ២០២២ បានអោយដឹងថា ទីភ្នាក់ងារព័ត៌មាន Interfax បានរាយការណ៍កាលពីថ្ងៃពុធថា អេស្តូនី បានផ្តល់យោបល់ថា ប្រាក់ដែលអឺរ៉ុបគ្រោងនឹងចំណាយលើប្រទេសរុស្ស៊ីសម្រាប់ការផ្គត់ផ្គង់ថាមពលរបស់ខ្លួន គួរតែត្រូវបានប្រើប្រាស់ក្នុងការកសាងប្រទេសអ៊ុយក្រែនឡើងវិញ។
រដ្ឋមន្ត្រីការបរទេសអេស្តូនី Eva-Maria Liimets បាននិយាយថា “ដើម្បីបង្កើតអោយមានផលប៉ះពាល់ភ្លាមៗ និងធ្វើឱ្យរុស្ស៊ីចំណាយលើអ្វីដែលបានធ្វើនៅអ៊ុយក្រែន” ការទូទាត់សម្រាប់ប្រេង និងឧស្ម័នរបស់ទីក្រុងម៉ូស្គូ គួរតែត្រូវបានដាក់ក្នុងធនាគារ ដើម្បីប្រើប្រាស់ក្នុងការកសាងអ៊ុយក្រែនឡើងវិញ។
ការអត្ថាធិប្បាយរបស់រដ្ឋមន្ត្រីការបរទេសអេស្តូនី Eva-Maria Liimets បានធ្វើឡើងនូវជំហរដែលសំដែងដោយនាយករដ្ឋមន្ត្រីរបស់ប្រទេសនេះគឺលោក Kaja Kallas កាលពីសប្តាហ៍មុន ដែលបានអំពាវនាវឱ្យ EU បង្កើតគណនីមួយដើម្បីដាក់ប្រាក់បញ្ញើជាបណ្តោះអាសន្នដែលជាថ្លៃទូទាត់សម្រាប់ប្រេង និងឧស្ម័នរបស់ទីក្រុងម៉ូស្គូ៕
