បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៧ ខែមីនា ឆ្នាំ២០២២ បានអោយដឹងថា បណ្តាញលក់រាយរបស់បារាំង Auchan នឹងបន្តប្រតិបត្តិការនៅក្នុងប្រទេសរុស្ស៊ីដដែរ នេះបើយោងតាមនាយកប្រតិបត្តិរបស់ក្រុមហ៊ុន លោក Yves Claude ដែលបាននិយាយថាហាងនៅតែដំណើរការក្នុងផលប្រយោជន៍របស់ជនស៊ីវិល។
លោក Yves Claude បាននិយាយក្នុងបទសម្ភាសន៍ជាមួយសារព័ត៌មាន Le Journal du Dimanche ប្រចាំសប្តាហ៍របស់បារាំងថា “វាគ្មានប្រយោជន៍ទេក្នុងការកំណត់មនុស្សប្រឆាំងនឹងគ្នា”។
ការអត្ថាធិប្បាយរបស់គាត់បានកើតឡើងប៉ុន្មានថ្ងៃបន្ទាប់ពីមានការអំពាវនាវរបស់ប្រធានាធិបតីអ៊ុយក្រែនលោក Volodymyr Zelensky ស្នើរឱ្យអាជីវកម្មរបស់បារាំងធ្វើការចាកចេញពីទីផ្សាររុស្ស៊ីបន្ទាប់ពីការវាយប្រហាររបស់ទីក្រុងម៉ូស្គូលើអ៊ុយក្រែន។
នាយកប្រតិបត្តិបាននិយាយថា “អ្វីដែលសំខាន់បំផុតសម្រាប់ពួកយើងគឺរក្សាបុគ្គលិករបស់យើង និងធានានូវការបំពេញបេសកកម្មចម្បងរបស់យើង ដើម្បីបន្តចិញ្ចឹមប្រជាជននៃប្រទេសទាំងពីរនេះ”៕
