បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២៦ ខែមីនា ឆ្នាំ២០២២ បានអោយដឹងថា ក្រសួងការពារជាតិចិនបានហៅសហរដ្ឋអាមេរិកថាជា “អ្នកកុហក និងជាអ្នកបង្កបញ្ហា” ហើយបាននិយាយថា “មនុស្សគ្រប់គ្នាដឹង” ថាប្រទេសណាជា “អ្នកផ្តួចផ្តើមដ៏ធំបំផុត” នៃវិបត្តិអ៊ុយក្រែន។
អ្នកនាំពាក្យក្រសួងការពារជាតិចិនលោក Wu Qian បានធ្វើអត្ថាធិប្បាយកាលពីថ្ងៃព្រហស្បតិ៍ លើការចោទប្រកាន់ពីមន្ត្រីអាមេរិកដែលមិនបញ្ចេញឈ្មោះដែលថាទីក្រុងប៉េកាំងបានដឹងជាមុនអំពីការវាយប្រហាររបស់រុស្ស៊ីលើអ៊ុយក្រែន ហើយថាចិនថែមទាំងបានស្នើឱ្យក្រុងម៉ូស្គូពន្យារពេលរហូតដល់ក្រោយព្រឹត្តិការណ៍កីឡាអូឡាំពិករដូវរងានៅទីក្រុងប៉េកាំងឆ្នាំ ២០២២។
លោក Wu Qian បានថ្កោលទោសការអះអាងនេះ រួមជាមួយនឹងរបាយការណ៍អំពីប្រទេសចិនដែលត្រូវបានចោទប្រកាន់ថាបានផ្តល់ជំនួយផ្នែកយោធាដល់ប្រទេសរុស្ស៊ីដែលជា “ព័ត៌មានមិនពិតទាំងស្រុង” ដែលបម្រើដល់គោលបំណងនៃ “ការបង្វែរការស្តីបន្ទោស លើប្រទេសចិន” ។
ការចោទប្រកាន់នេះបង្ហាញពី “មុខមាត់ពិតរបស់សហរដ្ឋអាមេរិក ជាអ្នកភូតកុហក និងជាអ្នកបង្កើតបញ្ហា” ដោយបន្ថែមថា ប្រទេសចិនប្រឆាំងយ៉ាងម៉ឺងម៉ាត់ចំពោះការប៉ុនប៉ងរបស់សហរដ្ឋអាមេរិកក្នុងការផ្សព្វផ្សាយ “ព័ត៌មានមិនពិត និងព្យាបាទដែលផ្តោតលើប្រទេសចិនចំពោះបញ្ហាអ៊ុយក្រែន”៕
