បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី២០ ខែមីនា ឆ្នាំ២០២២ បានអោយដឹងថាសហរដ្ឋអាមេរិក និងទួរគី កំពុងធ្វើការពិភាក្សាគ្នាលើកិច្ចព្រមព្រៀងមួយសម្រាប់ទីក្រុងអង់ការ៉ាក្នុងការបញ្ជូនប្រព័ន្ធការពារមីស៊ីល S-400 ផលិតដោយរុស្ស៊ីទៅកាន់អ៊ុយក្រែន ដែលជាថ្នូរនឹងការលុបចោលទណ្ឌកម្មដែលដាក់ដោយទីក្រុងវ៉ាស៊ីនតោនលើសមាជិកណាតូ។
ក្នុងនោះមន្ត្រីមន្ទីរបញ្ចកោណម្នាក់ដែលសុំមិនបញ្ចេញឈ្មោះបានប្រាប់ Sky News Arabia កាលពីថ្ងៃអាទិត្យថា “យើងកំពុងពិភាក្សាជាបន្តបន្ទាប់ជាមួយទីក្រុងអង់ការ៉ា ដើម្បីស្វែងរកនៅលទ្ធភាពក្នុងការបញ្ជូនប្រព័ន្ធការពារមីស៊ីល S-400 ទៅទីក្រុងគៀវ”។ មន្ត្រីរូបនេះបានបន្ថែមថា តួកគីអាចមើលឃើញ “ការទទួលត្រឡប់មកវិញនៅកម្មវិធី F-35 របស់ [NATO] និងការដកទណ្ឌកម្ម” ដែលដាក់ដោយទីក្រុងវ៉ាស៊ីនតោន៕
