បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទិ១៨ ខែមីនា ឆ្នាំ២០២២ បានអោយដឹងថាលោកប្រធានាធិបតីអាហ្វ្រិកខាងត្បូង Cyril Ramaphosa បានស្តីបន្ទោសអោយ NATO ក្នុងការចូលរួមចំណែកអោយមានសង្គ្រាមនៅអ៊ុយក្រែន ព្រោះតែចង់ពង្រីកឥទ្ធិពលរបស់ខ្លួនពេក។
លោក Cyril Ramaphosa បានបញ្ជាក់យ៉ាងដូច្នេះថា សង្គ្រាមអាចនឹងមិនកើតឡើង ប្រសិនបើណាតូ ស្តាប់ការព្រមានពីមេដឹកនាំនៃប្រទេសជាសមាជិក និងមន្ត្រីរបស់ខ្លួន ក្នុងរយៈពេលប៉ុន្មានឆ្នាំមកនេះថាការពង្រីកឥទ្ធិពលទៅកាន់ភាគខាងកើត នឹងនាំឲ្យមានអស្ថិរភាពក្នុងតំបន់កាន់តែខ្លាំង។
លោកបន្ថែមទៀតថា វាជារឿងសំខាន់ក្នុងការយល់ដឹងអំពីមូលហេតុនៃវិបត្តិនេះ ប៉ុន្តែមិនមែនបានន័យថា យើងយល់ស្របចំពោះការវាយប្រហាររបស់រុស្ស៊ី លើប្រទេសអ៊ុយក្រែនទេ។ យើងមិនអាចលើកលែងទោសចំពោះការប្រើកម្លាំង ឬការរំលោភច្បាប់អន្តរជាតិបានឡើយ៕
