បរទេស៖ នេះបើយោងតាមការចេញផ្សាយរបស់សារព័ត៌មាន RT នៅថ្ងៃទី១០ ខែមីនា ឆ្នាំ២០២២នេះ បានអោយដឹងថា កងទ័ពអង់គ្លេសត្រូវបានគេរាយការណ៍ថាកំពុងព្យាយាមតាមដានកងទ័ពមួយចំនួនដែលត្រូវបានគេសង្ស័យថាបានធ្វើដំណើរទៅកាន់ប្រទេសអ៊ុយក្រែនដោយខ្លួនឯង ខណៈរដ្ឋាភិបាលចក្រភពអង់គ្លេសមានគោលបំណងចង់ជៀសវាងអោយបានក្នុងការជាប់ពាក់ព័ន្ធនៅក្នុងជម្លោះយោធាអ៊ុយក្រែន-រុស្ស៊ីក៏ដោយ។
ក្នុងនោះអ្នកនាំពាក្យកងទ័ពអង់គ្លេសបានប្រាប់ Sky News កាលពីថ្ងៃពុធថា “យើងដឹងថាមានទាហានមួយចំនួនតូចដែលបានមិនគោរពតាមបញ្ជា ហើយបានអវត្តមាន ខណៈគ្មានថ្ងៃឈប់សម្រាក់។ ហើយពួកគេប្រហែលជាបានធ្វើដំណើរទៅអ៊ុយក្រែនដោយខ្លួន។ យើងកំពុងលើកទឹកចិត្តយ៉ាងសកម្ម និងយ៉ាងខ្លាំង ដើម្បីអោយពួកគេត្រឡប់ទៅចក្រភពអង់គ្លេសវិញ”។
បច្ចុប្បន្នកងទ័ពចក្រភពអង់គ្លេសត្រូវបានហាមឃាត់មិនឱ្យធ្វើដំណើរទៅអ៊ុយក្រែនដោយហេតុផលណាមួយ ទោះបីជាពួកគេត្រូវបានអនុញ្ញាតឱ្យឈប់សម្រាកក៏ដោយ។ អ្នកនាំពាក្យរូបនេះបាននិយាយថា អ្នកណាដែលបំពានច្បាប់នោះ “នឹងប្រឈមនឹងផលវិបាកខាងវិន័យ និងផ្នែករដ្ឋបាល”៕
