ភ្នំពេញ៖ អ្នកស្រី កែ សួនសុភី ម្ចាស់ក្លិបវិសាខា បានប្រកាសនៅរាត្រីយប់នេះថាអ្នកស្រី នឹងស្វែងរកអ្នកបុក ហើយរត់ ទៅលើករណី សមាជិកក្នុងក្រុមកីឡាបាល់ទាត់របស់អ្នកស្រី ដែលបានជួបគ្រោះថ្នាក់នៅរាត្រីយប់មិញ ។
ខ្សែបម្រើក្រុមវិសាខា កីឡាករ ទៀត គឹមហេង និងមិត្តស្រីរបស់គេ ដែលមានឈ្មោះហៅក្រៅថា អាជ្រុយ បានជួបគ្រោះថ្នាក់ចរាចរណ៍ដ៏រន្ធត់ រហូតដល់បាត់បង់ជីវិត កាលពីវេលាម៉ោង១ រំលងអធ្រាត្រម្សិលមិញនេះ ហើយមកដល់ពេលនេះ កីឡាករទៀត គឹមហេង បានស្ថិតក្នុងបន្ទប់សង្គ្រោះបន្ទាន់ និងមានបញ្ហារបួសជាច្រើនកន្លែង ។
គ្រោះថ្នាក់ដ៏រន្ធត់នេះ កើតឡើងនៅតាមបណ្តោយផ្លូវលេខ៣១០ កែងនឹងផ្លូវលេខ១៤៣ ស្ថិតក្នុងសង្កាត់បឹងកេងកង២ ខណ្ឌបឹងកេងកង រាជធានីភ្នំពេញ ត្រូវបានរថយន្តមិនចាំម៉ាកបើកយ៉ាងលឿនបុក ពេញទំហឹង ទៅលើ កីឡាករ ទៀត គឹមហេង ដែលកំពុងជិះម៉ូតូម៉ាក PCX ឌុបមិត្តស្រី បណ្តាលអោយហោះផ្លោងបោកនឹងខឿន។
ទន្ទឹមជាមួយបញ្ហានេះដែរវាបានបង្កើត រឿងរ៉ាវជាច្រើន ដោយយល់ច្រលំទៅកាន់ កីឡាករទៀត គឹមហេង ខណៈដែលមានការអាងចុងក្រោយថា ក្រោយពី ទៀត គឹមហេង ដឹងថា មិត្តស្រីរបស់ខ្លួនស្រលាញ់ជាច្រើនឆ្នាំស្លាប់នោះ បានធ្វើឲ្យកីឡាករវ័យក្មេងនេះ យំរហូតចេញឈាមតាមត្រចៀក ខណៈដែលកំពុងសង្គ្រោះបន្ទាន់ ។
ម្ចាស់ក្លិបវិសាខា អ្នកស្រី កែ សួនសុភី បានឃើញយ៉ាងដូច្នោះ បានសរសេរនៅលើបណ្តាញទំនាក់ទំនងសង្គមរបស់អ្នកស្រី យ៉ាងខ្លីថា «we will find u hit and run !!! » ដែលប្រែជា ខេមរៈ ភាសាថា «យើងនឹងស្វែងរកអ្នកបុក ហើយរត់ » ។ ក្នុងនោះដែរលោកស្រីក៏បាន ថេកទៅកាន់មន្ត្រីធំក្នុងផែនចរាចរណ៍ ផងដែរ ៕
