ក្លឹបមេឃខៀវ Man City ត្រូវបានកាសែត The Sun ចេញផ្សាយនៅថ្ងៃនេះបានឈានទៅដល់កិច្ចព្រមព្រៀងរួចរាល់អស់ហើយក្នុងការចុះកុងត្រានាំយកយុវជនឆ្នើមម្នាក់របស់ក្លឹប PFC Slavia Sofia មករួមក្លឹបក្រោយការធ្វើតេស្តសុខភាពកាលចុងសប្តាហ៍បានទទួលជោគជ័យ។
កីឡាករ Filip Krastev អាយុ១៨ឆ្នាំនឹងត្រូវចូលរួមជាមួយឈុតយុវជនរបស់ក្លឹបនៅទឹកដី Etihad ជាផ្លូវការបន្ទាប់ពីការធ្វើតេស្តប៉ុន្តែនឹងត្រូវបន្តលេងនៅជាមួយនឹងក្លឹបចាស់រហូតដល់ដំណាច់ឆ្នាំជាមុនសិននេះបើយោងតាមប្រធានក្លឹប Slavia លោក Vensteslav Sefanov បានបញ្ជាក់អះអាង។
ក្នុងនាមជាកីឡាករវ័យក្មេងអាយុទើបតែ១៨ឆ្នាំពិតមែនប៉ុន្តែកីឡាកររូបនេះបានបង្ហាញខ្លួនឲ្យឈុតធំរបស់ក្លឹបនៅលីគកំពូលប៊ុលហ្គារីមួយនេះបានទៅដល់២៥ដងមកហើយ។ប្រធានក្លឹបលោក Slavia បានបញ្ជាក់ថាការចុះហត្ថលេខាជាផ្លូវការនឹងធ្វើឡើងនៅសប្តាហ៍ក្រោយហើយនឹងប្រកាសជាសាធារណៈក្នុងពេលឆាប់ៗនេះ៕
ប្រែសម្រួល៖Lee
