ក្រុម Southampton បានតាំងចិត្ត ក្នុងការប្រជែង ជាមួយក្លិប កាំភ្លើងធំ និងមាន់ខ្នាយ មាស រួមទាំងក្លិបនៅលីកផ្សេងទៀត ក្នុងការនាំយកខ្សែការពារ Axel Disasi ។
Southampton កំពុងចាប់អារម្មណ៍មែនទែន ទៅលើខ្សែការពារកណ្តាល អាយុ ២២ឆ្នាំនេះ ដែលបានជួយឲ្យក្រុម Reims បញ្ចប់ក្នុងចំណាត់ថ្នាក់លេខ ៦ ។
ខ្សែការពារកម្ពស់ ១.៩០ ម៉ែត្ររូបនេះ ត្រូវបានគេចាប់អារម្មណ៍យ៉ាងខ្លាំង ជាមួយគុណ សម្បត្តិលេងរបស់គាត់ ជាមួយស្ថានភាពការពារ ហើយត្រូវបានគេរំពឹងថា នឹងមានតម្លៃ ១៣លានផោន ដោយអាចចាកចេញពីក្លិបនៅរដូវកាលនេះ ខណៈកុងត្រា លេងរបស់គាត់ នៅសល់ រយៈពេល ១ឆ្នាំ ។
ខ្សែការពារ សញ្ជាតិបារាំងរូបនេះ ក៏ក្លាយជាគោលដៅរបស់ក្លិប Arsenal, Tottenham, West Ham និង Monaco ។
ខណៈដែលកីឡាករផ្សេងៗ នៅក្នុងក្លិបមានការតឹងតែង ក្នុងការកាត់ប្រាក់ឈ្នួលរបស់ពួកគេ ប៉ុន្តែ Southampton គឺជាក្លឹបដំបូងនៃក្របខ័ណ្ឌ Premier League ដែលកីឡាករ យល់ព្រម កាត់ប្រាក់ឈ្នួល ។ ក្នុងនោះមានការព្រមព្រៀងកាត់ប្រាក់ឈ្នួល រយៈពេល ៣ខែ ចំនួន ១០ភាគរយ ហើយវានឹងត្រូវបានគេទូទាត់សងវិញ ក្នុងខែតុលា ។
ករណីនេះ វានឹងធ្វើឲ្យ Southampton មានភាពធូរស្រាល ក្នុងហិរញ្ញវត្ថុ ដែលអាចនឹងមានលទ្ធភាព ក្នុងទីផ្សារដោះដូរ កីឡាករនាពេលខាងមុខ៕
