Real Madrid និង Barcelona នឹងព្យាយាមចុះហត្ថលេខាលើ Marcus Rashford ពី Manchester United នាពេលអនាគត។
តារាបាល់ទាត់របស់ក្លិបបិសាចក្រហម កំពុងរីករាយ ជាមួយរដូវកាលដ៏ល្អ ដោយស៊ុតបញ្ចូលទីបាន ១៩គ្រាប់ រហូតដល់បាល់ទាត់ត្រូវបានផ្អាក ដោយសារតែជំងឺផ្លូវដង្ហើមកូវីដ១៩ ។
កីឡាករអាយុ ២២ឆ្នាំនេះ បានចុះហត្ថលេខាថ្មី រយៈពេល ៤ឆ្នាំ ជាមួយតម្លៃខ្លួន លេងប្រចាំសប្តាហ៍ ចំនួន ៣សែនផោន កាលពីរដូវកាលមុន ហើយជាកីឡាករដ៏សំខាន់ម្នាក់ ក្រោមការ ដឹកនាំរបស់លោក Ole Gunnar Solskjaer ។
ហើយអតីតខ្សែប្រយុទ្ធ Crystal Palace លោក Morrison ជឿជាក់ថា Rashford គឺជាកីឡាករបាល់ទាត់ឆ្នើមម្នាក់ក្នុងចំណោមកីឡាករបាល់ទាត់ឆ្នើម ៗ នៅលើពិភពលោកជាមួយនឹងចំណាប់អារម្មណ៍ផ្ទេរពីក្រុមយក្ស LaLiga ។
Morrison បានថ្លែងថា គាត់(Rashford) នឹងកាន់តែប្លែក ហើយកាន់តែល្អ សូមកត់សម្គាល់ពាក្យខ្ញុំទៅ ហើយខ្ញុំគិតថា Barcelona ឬ Real Madrid នឹងព្យាយាមចុះហត្ថលេខា ក៏ព្រោះតែ Rashford មានទេពកោសល្យពិសេស ។ លោកបានបន្តថា គាត់ជាកីឡាករម្នាក់ដែលនៅក្មេង អាចលេងបានច្រើន គាត់មានបញ្ញាស្មារតីខ្លាំង គាត់ជាកីឡាករអស្ចារ្យម្នាក់។ អ្នកត្រូវការរបស់ដូចនេះនៅក្នុងអាជីព។ លោកបានបន្ថែមថា Rashford គឺជាកីឡាករបាល់ទាត់ឆ្នើមម្នាក់នៅពេលនេះ ៕
