យោងតាមរបាយការណ៍បានអោយដឹងថាក្រុមបាសេឡូណាបានព្យាយាមចុះហត្ថលេខាឡើងវិញយកកីឡាករ Andres Iniesta ពី Vissel Kobe ក្នុងខែមករា កន្លងទៅ តែការព្យាយាមនេះបានបរាជ័យ។ នេះបើយោងតាមគេហទំព័រ The Sun បានចុះផ្សាយ។
ខ្សែបម្រើរូបនេះ បានចូលរួមលេងជាមួយក្លិបអ្នកមានបុណ្យតាំងពីអាយុ ១២ឆ្នាំ និងបានចំណាយពេល ២២ឆ្នាំ នៅក្លិបមុនពេលចាកចេញ កាលពីខែឧសភា ឆ្នាំ២០១៨ ។
អំឡុងពេលនៅ Camp Nou គាត់បានឈ្នះពានរង្វាន់ចំនួន ៣៥ រួមទាំងពានរង្វាន់ La Liga ចំនួន ៩ និង Champions League ចំនួន ៤ ។ កីឡាករខាងលើ ជិតចាប់ផ្តើមរដូវកាលទី៣ ជាមួយ Vissel Kobe ហើយបានជួយឲ្យក្លិបឈ្នះពាន Emperor’s Cup និង Japanese Super Cup ។
ទោះបីជាយ៉ាងនេះក្តី ប្រភពខាងលើបានបញ្ជាក់ថា Barcelona បានព្យាយាមចុះហត្ថលេខាកីឡាកររូបនេះ ឲ្យមកជួយលេងក្នុងលក្ខណ្ឌខ្ចីជើង ជាមួយរដូវកាលដែលកំពុងសេសសល់។
របាយការណ៍ខាងលើបានបន្តថា មូលហេតុដែលក្លិបអ្នកមានបុណ្យចង់នាំ Andres Iniesta មកវិញ ក៏ដោយសារតែពួកគេចង់ពង្រឹងនូវក្រុមខ្លួនឡើងវិញ ។ ទោះយ៉ាងណាក៏ដោយ ក្លិបនៅទឹកដីជប៉ុន បានច្រានចោលនូវសំណើរនេះ ដោយមិនចង់ប្រគល់នូវកីឡាករដ៏សំខាន់ ដែលគន្លឹះនាំមកនូវជោគជ័យរបស់ពួកគេឡើយ។
ក្នុងបទសម្ភាសន៍ជាមួយ Barca TV កាលពីខែមុនបានចុះផ្សាយថា គ្រូបង្វឹកថ្មីរបស់ក្លិប ចង់នាំយកកីឡាករអាយុ ៣៥ឆ្នាំខាងលើ មកកាន់ទឹកដី ខេមណូ សារជាថ្មី។
នៅពេលដែលអ្នកកាសែតសួរនាំថា មួយណាក៏តែចុះហត្ថលេខាយកមកវិញ លោក Setien បានឆ្លើយថា Andres Iniesta គួរតែមិនទាន់ចូលនិវត្តន៍នោះទេ យើងគួរតែនាំគាត់មកវិញ៕
