អតីតខ្សែបម្រើរបស់ហង្សក្រហមលោក Danny Murphy អាយុ ៤២ឆ្នាំ បានជឿជាក់ថា បើសិនជាហង្សក្រហមចុះហត្ថលេខាយកកីឡាករ Kylian Mbappe វានឹងក្លាយជាសំណើរមួយ ដ៏គួរឲ្យខ្លាច ខណៈដែលពួកគេមានកីឡាករ Roberto Firmino ល្អហើយនោះ។
ស្លាបប្រយុទ្ធរបស់ PSG ត្រូវបានផ្សារភ្ជាប់ផ្លាស់ទៅកាន់ពហុកីឡដ្ឋាន Anfield ហើយលោក Jurgen Klopp បានសរសើរដល់ម្ចាស់ពានរង្វាន់ពិភពលោកបារាំងវ័យក្មេងរូបនេះណាស់ ។ អំឡុងពេលនេះដែរ Roberto Firmino កំពុងត្រៀមខ្លួនផ្លាស់ទៅកាន់ទឹកដី Bayern Munich នាពេលខាងមុខ។
Firmino កន្លងទៅបានក្លាយជាផ្នែកមួយដ៏សំខាន់សម្រាប់យុទ្ធសាស្ត្រលើវាលស្មៅ របស់គ្រូបង្វឹកសញ្ជាតិអាល្លឺម៉ង់ ដោយរកបាន៨គ្រាប់ និងបញ្ជូនបាល់ផ្តាច់ទីបាន ៧លើក ដែលជាកីឡាករ យ៉ាងសំខាន់ក្នុងតំបន់ផ្តាច់ទី ដើរតួជាមួយ Sadio Mane និង Mohamed Salah ។
ប៉ុន្តែក្នុងនោះ អតីតកីឡាករ Danny Murphy បានលើកឡើងថា Virgil van Dijk មិនអាចរកអ្នកជំនួសបាននោះទេសម្រាប់ការការពារតំណែងនៅលើកំពូលតារាងនៃលីកអង់គ្លេស។ទោះជាយ៉ាងណា ការចង់បាន Kylian Mbappe មកកាន់ទឹកដីអង់គ្លេសរបស់ក្លិបហង្សក្រហមវាកាន់តែធ្វើឲ្យតំបន់ប្រយុទ្ធ កាន់តែងខ្លាំងក្លា នឹងគួរឲ្យភ័យខ្លាចសម្រាប់ក្លិបផ្សេងៗ ដែលជួបពួកគេ។
Murphy បានថ្លែងប្រាប់ TalkSport ថា Van Dijkគឺជាកីឡាករដែលមិនអាចរកអ្នកជំនួសបាន តើពួកគេអាចរកកីឡាករជំនួសតំណែង Roberto Firmino ដែលរកគ្រាប់បាល់បានច្រើនទេ ? ត្រូវណាស់គឺមាន ។ តើពួកគេអាចជួយ Roberto Firmino នឹងរួបរួមក្រុមបានល្អដែរទេ ? ប្រហែលជាមិនមានទេ ប៉ុន្តែនៅខាងក្រៅក្រុមរបស់ពួកគេគឺមានកីឡាករជំនួស។
លោកបានបន្តថា Roberto Firmino បានបំពេញប្រព័ន្ធលេងយ៉ាងល្អ សម្រាប់ហង្សក្រហម ជាមួយស្លាបប្រយុទ្ធទាំងពីរ ។
Firmino គឺល្អ ហើយត្រូវបានគេស្រលាញ់ខ្លាំង ដូចជា Suarez ដែរ ។ លោកបានបន្តថា ប្រសិនបើហង្សក្រហមព្រមចោល Firmino ហើយស្រវ៉ាយក Kylian Mbappe នោះនៅតំបន់ប្រយុទ្ធខ្ញុំគិតថា វាជារឿងគួរឲ្យខ្លាចជាងគេក្នុងពិភពបាល់ទាត់ ដែលហង្សក្រហមកំពុងមាន Firmino លេងជាមួយ Salah និង Mane ទៅទៀត។ លោកថា លោកមិនបង្អាប់ទៅលើ Roberto នោះទេ គាត់ក៏ជាកីឡាករល្អ និងអស្ចារ្យផងដែរ៕
