ភ្នំពេញ៖ ដាវ នីម បច្ចុប្បន្នមានវ័យ ២៤ឆ្នាំ បានក្លាយជាទីចាប់អារម្មណ៍មួយសម្រាប់អ្នកនិយមបាល់ទាត់ក្នុងស្រុក ដោយខ្សែប្រយុទ្ធវ័យក្មេងនេះ បានលើកឡើងថា ខ្លួនពុំមានការអាក់អន់ស្រពន់ចិត្តឡើយ ចំពោះការធ្លាក់ចេញពីបញ្ជីកីឡាករជម្រើសជាតិនាពេលកន្លងមក។
បើតាមការផ្តល់បទសម្ភាសន៍ជូន គេហទំព័រ គណៈកម្មការប្រកួតបាល់ទាត់ជាតិកម្ពុជា ដោយកីឡាករកម្ពុជាក្រោមរូបនេះបានលើកឡើងថា «ខ្ញុំអត់មានអន់ចិត្តអីទេ ព្រោះសមត្ថភាពអត់ដល់គេ ប៉ុន្តែសប្បាយចិត្តចំពោះការផ្ដល់ឱកាសរបស់គ្រូ។ ក្រោយពេលប្រកាសបញ្ជីចុងក្រោយ គាត់ប្រាប់ខ្ញុំពីចំនុចខ្លាំង និងចំនុចខ្សោយរបស់ខ្ញុំ ដែលគាត់បានមើលឃើញ ហើយផ្ដាំឲ្យខ្ញុំខំប្រឹងប្រែងថែមទៀត។ គាត់ឲ្យខ្ញុំមើលវីដេអូតាម YouTube ហើយហ្វឹកហាត់តាមគេ ដើម្បីឲ្យខ្ញុំអភិវឌ្ឍន៍ខ្លួនបានល្អជាងមុន ជួយក្លិបរកលទ្ធផលល្អ និងត្រៀមសម្រាប់ការរើសកីឡាករជម្រើសជាតិលើកក្រោយទៀត»។
កីឡាករដែលចូលរួមជាមួយគីរីវង់តាំងពីឆ្នាំ២០១៥ ត្រូវបានគ្រូបង្វឹក Felix Dalmas ហៅចូលក្នុងបញ្ជីបឋមក្រុមជម្រើសជាតិត្រៀមវគ្គជម្រុះវើលខាប់ជុំទី១ តែត្រូវកាត់ចេញជាមួយ ស៊ិន សុផាណាត់ និង ម៉ៅ ពិសិដ្ឋ ពីបញ្ជីចុងក្រោយ។
បញ្ជាក់ផងដែរថា នៅក្នុងការប្រកួត METFONE CAMBODIAN LEAGUE 2019 សប្តាហហ៍ទី12 កីឡាករដាវ នីម បានស្ថិតក្នុងបញ្ជីរកីឡាករ ៦នាក់ ជាអ្នកទាត់បញ្ចូលទីបានច្រើនជាងគេ ដោយរកបានរហូតដល់ទៅ ១០គ្រាប់៕
